पुणे : शहरातील मेट्रो प्रकल्पाचं उद्घाटन पंतप्रधान नरेंद्र मोदी यांच्या हस्ते करण्यात आलं आहे. या कार्यक्रमाला राज्याचे उपमुख्यमंत्री आणि पुण्याचे पालकमंत्री अजित पवार (Ajit Pawar Pune) हेदेखील उपस्थित होते. या कार्यक्रमात बोलताना अजित पवार यांनी पुणे मेट्रोविषयी भाष्य केलं. तसंच यावेळी अजित पवार यांनी राज्यपाल भगतसिंह कोश्यारी (Governor Bhagat Singh Koshyari) यांनी छत्रपती शिवाजी महाराज आणि महात्मा फुलेंबाबत केलेल्या वादग्रस्त वक्तव्याबाबत पंतप्रधानांसमोर नाराजी व्यक्त केली आहे.

‘मला पंतप्रधानांच्या लक्षात आणून द्यायचं आहे की, महत्त्वाच्या पदांवर असणाऱ्या काही व्यक्तींकडून अनावश्यक वक्तव्य केली जात आहेत, ते महाराष्ट्राला परवडणारे नाही. त्यामुळं याकडेही लक्ष द्यावं,’ असं म्हणत अजित पवार यांनी राज्यपाल भगतसिंह कोश्यारी यांचं नाव न घेता त्यांच्या वादग्रस्त वक्तव्यांवर टीका केली आहे. ‘छत्रपती शिवाजी महाराजांनी राजमाता जिजाऊंच्या स्वप्नातील स्वराज्य स्थापन केलं आणि महात्मा जोतिबा फुले आणि सावित्रीबाई फुले यांनी देशात स्त्री शिक्षणाचा पाया घातला. या महापुरुषांचे विचार पुढे घेऊन जाण्याचं काम आपल्याला करायचं आहे,’ असंही अजित पवार म्हणाले.

पुण्यात मोदींच्या दौऱ्याची चर्चा सुरू असतानाच रोहित पवारांनी दिला भाजपला धक्का!

‘पुणेकरांच्या सहनशीलतेला दाद द्यावी लागेल’

पुणे मेट्रोच्या कामाबद्दल बोलताना अजित पवार यांनी शहरातील भाजपच्या नेत्यांना टोला लगावला आहे. ‘घोषणेपासून मेट्रो प्रत्यक्षात धावायला १२ वर्ष लागली. काही लोकप्रतिनिधींच्या हट्टापायी मेट्रो प्रकल्प रखडला. या काळात पुणेकरांना मोठा त्रास सहन कारावा लागला. त्यामुळे आपल्याला पुणेकर आणि पिंपरी चिंचवडकरांच्या सहनशीलतेला दाद द्यावी लागेल,’ असं अजित पवार यांनी म्हटलं आहे. तसंच नव्या विकासकामांमुळे पुणे आणि पिंपरी चिंचवडच्या पायाभूत सुविधांमध्ये मोठी भर पडणार आहे, असंही ते म्हणाले.

LEAVE A REPLY

Please enter your comment!
Please enter your name here