गेल्या काही दिवसांपासून ठाण्यातील घोडबंदर रोडवर बिबट्याचा वावर वाढला आहे. गेल्या आठवड्यात घोडबंदर रोडवरील कासारवडवली परिसरातील पारिजात गार्डन या सोसायटीमधील नागरिकांना पहाटेच्या सुमारास बिबट्याचे दर्शन झाले होते. त्यावेळी हा बिबट्या बिनधास्तपणे मुक्तसंचार करताना सीसीटीव्हीमध्ये कैद झाला होता. तसेच याआधी देखील या सोसायटीत ३ ते ४ वेळा बिबट्या दिसून आल्याचे नागरिकांनी सांगितले. त्यामुळे परिसरात घबराटीचे वातावरण पसरले आहे. काल, शनिवारी दुपारी २ वाजण्याच्या सुमारास याच सोसायटीमधील सुरक्षारक्षक इमारतीच्या मागच्या बाजूला असलेल्या पाण्याच्या टाकीची पाहणी करण्यासाठी गेला असता, त्या ठिकाणी बिबट्या झाडाखाली बसलेला दिसून आला. त्यानंतर सुरक्षारक्षकाने सोसायटीतील नागरिकांना माहिती दिली. त्यानंतर परिसरात पुन्हा एकदा भीतीचे वातावरण पसरले. स्थानिकांनी वेळ न घालवता वनविभाग आणि पोलीसांना पाचारण केले. बिबट्याची माहिती मिळताच वनविभागाचे पथक, वाइल्ड लाईफ वेल्फेअर असोसिएशनचे पथक आणि कासारवडवली पोलीस घटनास्थळी पोहचले. मिळालेल्या माहितीनुसार वनविभागाकडून शोध मोहीम सुरू झाली. तब्बल ४ तास या बिबट्याचा शोध घेतला. सोसायटीतील सर्व नाले, गटारे, आजूबाजूचा परिसर वनविभाग आणि वाइल्ड लाइफ वेल्फेअर असोसिएशनच्या पथकाकडून पिंजून काढण्यात आला. मात्र, बिबट्या सापडला नाही.
Ratnagiri : ७० वर्षीय वृद्धाला दोघांनी केली लोखंडी रॉडने मारहाण; असं काय घडलं?
Ulhasnagar News : उल्हासनगरमध्ये भटक्या कुत्र्यांची दहशत, एकाच दिवशी १५ जणांना चावा
बोरीवली येथील संजय गांधी उद्यान जवळ असल्यामुळे या परिसरात बिबट्याचे दर्शन नेहमीच होत असते. भटक्या कुत्र्यांची शिकार करण्यासाठी बिबटे शहरात येत असतात. काल हा बिबट्या दिवसाढवळ्या मुक्तसंचार करताना दिसून आला. सोसायटीच्या २०० मीटरच्या आत बिबट्याने लपण्यासाठी जागा शोधून ठेवली असावी असा कयास वनविभागाकडून व्यक्त करण्यात आला. त्यामुळे स्थानिकांनी सतर्क राहण्याचा इशारा यावेळी वनविभागाकडून देण्यात आला. रात्रीच्या सुमारास महिला, वृद्ध आणि विशेष करून लहान मुलांनी घराबाहेर पडू नका, सुरक्षा रक्षकांनी हातात काठ्या ठेवा, पाय आपटत चाला, काही हालचाल आढळल्यास फटाके वाजवा अशा सूचना वनविभागाकडून देण्यात आल्या.
कल्याणच्या गौरीपाडा तलावातील ८० कासवांच्या मृत्यूचं गूढ उकललं, जाणून घ्या नक्की काय घडलं?
