डोंबिवली: रस्त्याने जाणाऱ्या वृद्ध महिलेच्या गळ्यातील चेन खेचून पळून गेलेला चोरटा ज्वेलर्सच्या दुकानात दागिने विकण्यासाठी येणार असल्याची माहिती कल्याण क्राइम ब्रांचला मिळाली होती. या माहितीच्या आधारे पोलिसांनी ज्वेलर्सच्या दुकानाबाहेर सापळा रचला. या सापळ्यात चोरटा अलगद अडकला. संतोष तेलंग असे या चोरट्याचे नाव आहे. तो रिक्षाचालक होता. तीन महिन्यांपूर्वी तो आजारी पडल्याने रिक्षा चालवणे बंद केले होते. रिक्षाचे थकलेले कर्ज व कुटुंबाचा उदरनिर्वाह कसा चालवायचा या आर्थिक विवंचनेतून त्याने हा गैरमार्ग अवलंबला होता, अशी माहिती तपासात उघड झाली आहे.

आरोपी संतोष हा चोरी केलेले दागिने कल्याण बाजारपेठ परिसरात एका ज्वेलर्सच्या दुकानात विकण्यासाठी येणार असल्याची माहिती कल्याण क्राइम ब्रांचचे विनोद चन्ने यांना गस्तीवर असताना मिळाली होती. या माहितीच्या आधारे कल्याण क्राइम ब्रांचचे वरिष्ठ पोलीस निरीक्षक किशोर शिरसाठ यांच्या पथकाने या परिसरात सापळा रचला. दागिने विकण्यासाठी आलेल्या संतोषला त्यांनी ताब्यात घेतले. त्याला पोलिसांनी खाक्या दाखवताच काही दिवसांपूर्वी बाजारपेठ पोलीस ठाण्याच्या हद्दीतून एका वृद्ध महिलेची चेन खेचून पळ काढला होता, अशी कबुली दिली. ही सोन्याची चेन विकण्यासाठी ज्वेलर्समध्ये आल्याची माहिती त्याने पोलिसांना दिली.

ठाण्यात दिवसाढवळ्या बिबट्याचा मुक्तसंचार; झाडाखाली बसलेला पाहून सुरक्षारक्षकाची भंबेरी
Ulhasnagar News : उल्हासनगरमध्ये भटक्या कुत्र्यांची दहशत, एकाच दिवशी १५ जणांना चावा

संतोष तेलंग याच्याकडून पोलिसांनी चोरीची चेन जप्त केली आहे. यानंतर या इमारतीचे सीसीटीव्ही फुटेज तपासून खात्री करून घेत पोलिसांनी संतोषला अटक केली. संतोषने याआधी अशा प्रकारे चोरी केली आहे का, याबाबत तपास सुरू आहे. दरम्यान संतोष हा रिक्षा चालवत होता. रिक्षा चालवून तो कुटुंबाचा उदरनिर्वाह करत होता. तीन महिन्यांपूर्वी तो आजारी पडला आणि आजारपणामुळे तो रिक्षा चालवू शकला नाही. त्यामुळे रिक्षासाठी घेतलेल्या कर्जाचे हप्ते थकले. तसेच कुटुंबाचा उदरनिर्वाह कसा करायचा, असा प्रश्न त्याच्यासमोर होता. आर्थिक विवंचनेतून त्याने चोरीचा मार्ग पत्करला.

उल्हासनगरमध्ये रिक्षा चालकाचा अल्पवयीन मुलीवर बलात्कार; आरोपी जेरबंद

LEAVE A REPLY

Please enter your comment!
Please enter your name here