म. टा. प्रतिनिधी, मुंबईः राज्याची जीवनवाहिनी असलेल्या एसटीमध्ये महिला सबलीकरणासाठी महिलांना चालकपदी नियुक्त करण्याचा निर्णय महामंडळाने घेतला होता. १९४ महिला चालकांचे प्रशिक्षण सुरूही करण्यात आले. मात्र आधी करोना आणि त्यानंतर एसटी संपामुळे हे प्रशिक्षण स्थगित झाल्याची माहिती समोर येत आहे. आंतरराष्ट्रीय महिला दिनाच्या निमित्ताने हा प्रश्न पुन्हा ऐरणीवर आला आहे.

जवळपास दोन वर्षांच्या करोनाकाळामुळे एसटी वाहतुकीसह सर्वच उपक्रमावर प्रचंड मर्यादा आल्या. करोनासंबंधी निर्बंध शिथिल होऊन एसटी पूर्वपदावर येत असतानाच एसटीतील सर्वपक्षीय संघटनांनी अघोषित संपाची हाक दिली. याला कर्मचाऱ्यांचा उदंड प्रतिसाद लाभला. संघटनांचे आंदोलन सध्या कर्मचारी आंदोलन झाले आहे. यात प्रशिक्षण देणारे कर्मचारीदेखील सहभागी असल्याने महिला चालक प्रशिक्षण स्थगित करावे लागले आहे, असे एसटीतील वरिष्ठ अधिकाऱ्यांनी सांगितले.

एसटी महामंडळाने २०१९ मध्ये चालकपदी महिलांना नियुक्त करण्याची घोषणा केली. महिला चालकांचा प्रतिसाद वाढवण्यासाठी अटी शिथिल करण्यात आल्या. केवळ चारचाकीच्या अनुज्ञप्तीवर (लायसन्स) त्यांचा महामंडळात समावेश करून घेण्यात आला. महामंडळातील अनुभवी आणि वरिष्ठ अधिकाऱ्यांच्या देखरेखीखाली त्यांचे तंत्रशुद्ध प्रशिक्षण देण्यात येणार होते. हे प्रशिक्षण पूर्ण झाल्यावर त्यांना बस चालवण्यासाठी अवजड वाहन चालवण्याचे अनुज्ञप्ती काढण्याची प्रक्रियादेखील महामंडळाकडूनच पूर्ण करण्याचे नियोजन होते. यासाठी १९४ महिलांना प्रशिक्षणार्थीची निवड करण्यात आली होती.

प्रशिक्षणानंतर रुजू करणार

याबाबत महामंडळाचे व्यवस्थापकीय संचालक शेखर चन्ने यांच्याशी संपर्क साधला असता, महिला चालकांचे प्रशिक्षण सुरू आहे. त्यांना एक वर्ष प्रशिक्षण देण्यात येणार आहे. हा कालावधी पूर्ण झाल्यावर त्यांना महामंडळात रुजू करण्यात येईल, असे ते म्हणाले.

LEAVE A REPLY

Please enter your comment!
Please enter your name here