मुंबई: पाच राज्यांच्या निवडणुका संपल्यामुळे मुंबईसह देशभरात इंधनाचे दर सुस्साट वाढणार असल्याचा अंदाज वर्तवला जात आहे. उत्तर प्रदेश, मणिपूर, पंजाब, उत्तराखंड आणि गोवा या पाच राज्यांमध्ये गेल्या महिनाभरापासून निवडणूक प्रक्रिया सुरु होती. सोमवारी उत्तर प्रदेशातील सातव्या आणि अंतिम टप्प्यातील मतदान पार पडले. निवडणुकीच्या काळात मतदारांच्या नाराजीच्या भीतीने केंद्र सरकारने पेट्रोल (Petrol price) आणि डिझेलच्या (Diesel price) दरात एका पैशाचीही वाढ होणार नाही, याची पूरेपूर काळजी घेतली होती. रशिया-युक्रेन युद्धामुळे आंतरराष्ट्रीय बाजारात कच्च्या तेलाचे भाव सार्वकालिक उच्चांकी पातळीवर पोहोचले असतानाही भारतीय पेट्रोलियम कंपन्यांनी इंधनाच्या दरात वाढ केली नव्हती. त्यामुळे पाच राज्यांच्या निवडणुका आटोपल्यानंतर पेट्रोल आणि डिझेलचे दर मोठी उसळी घेतील, असा अंदाज आहे. त्यामुळे मुंबईकरांनी मंगळवारी सकाळी शहरातील पेट्रोल पंपांवर बऱ्यापैकी गर्दी केली होती. मोठी दरवाढ होण्यापूर्वी वाहनांच्या टाक्या फुल्ल करून घेतल्या जात आहेत. त्यामुळे सध्या मुंबईसह राज्यातील सर्वच भागांतील पेट्रोलपंप चालकांना ‘अच्छे दिन’ आले आहेत. (Petrol and Diesel price may hike soon)
Petrol-Diesel Price Today: आजच इंधन टाकी करा फुल्ल! पेट्रोल-डिझेल दरवाढीचा उद्या बाॅम्ब फुटणार कारण…
दरम्यान, मंगळवारी पेट्रोलियम कंपन्यांकडून इंधनाच्या दरात कोणतीही दरवाढ करण्यात आलेली नाही. केवळ स्थानिक पातळीवर पेट्रोल आणि डिझेलच्या दरात बदल झालेले आहेत. मात्र, देशातील प्रमुख शहरांमध्ये तुर्तास इंधनाचे दर स्थिर आहेत. गेल्या काही दिवसांमध्ये आंतरराष्ट्रीय पातळीवर कच्च्या तेलाच्या दरात झालेली वाढ पाहता आगामी काळात पेट्रोल आणि डिझेल प्रतिलीटर १० ते १२ रुपयांनी महाग होईल, अशी शक्यता आहे. सध्या मुंबईत पेट्रोलचा प्रतिलीटर दर १०९.९८ इतका आहे. तर एका लीटर डिझेलसाठी ९४.१४ रुपये मोजावे लागत आहेत. त्यामुळे मोठी दरवाढ झाल्यास पेट्रोल १२० रुपये तर डिझेल शंभरीपार जाण्याची शक्यता आहे.

देशातील प्रमुख शहरांमधील इंधनाचे दर?

दिल्ली: पेट्रोल ९५.४१ रुपये प्रति लिटर, डिझेल ८६.६७ रुपये प्रति लिटर
मुंबई: पेट्रोल १०९.९८ रुपये प्रति लिटर, डिझेल ९४.१४ रुपये प्रति लिटर
चेन्नई: पेट्रोल १०१.५१ रुपये प्रति लिटर, डिझेल ९१.५३ रुपये प्रति लिटर
कोलकत्ता: पेट्रोल १०४.६७ रुपये प्रति लिटर, डिझेल ८९.७९ रुपये प्रति लिटर

RELATED ARTICLESMORE FROM AUTHOR

LEAVE A REPLY

Please enter your comment!
Please enter your name here