मुंबई- भारतीय सिनेसृष्टीत महिलांना किंवा स्त्रीला सतत घरच्या कामात व्यग्र असणारी, अपमान सहन करणारी आणि स्वत:चं मत नसणारी दाखवण्यात आलं आहे. परंतु हे चित्र आता पूर्णपणे बदललं आहे. आता स्त्रीप्रधान चित्रपट भरपूर येतात. त्यात भारतीय स्त्री एक आत्मनिर्भर, स्वत:साठी उभी राहणारी, अत्याचाराच्या विरोधात आवाज उठवणारी, सक्षम दाखवली आहे. या आंतरराष्ट्रीय महिला दिनानिमित्त इथे काही पॉवर-पॅक चित्रपट आहेत जे तुम्ही पाहू शकता. हे असे चित्रपट आहेत जे तुम्हाला नक्कीच विचार करायला भाग पडतील.


दलित महिलांवर होणारे अत्याचार अपरिमित आहेत. त्या विरोधात आवाज उठवणंही अनेकदा कठीण होऊन जातं. आपली सामाजिक व्यवस्था, कायद्यातल्या पळवाटा यामुळे दलित महिलांची कोंडी होते. पण यावरच उत्तर म्हणजे युडली फिल्म्सचा ‘200 हल्ला हो’. या चित्रपटात दलित महिलांनी वेगळी भूमिका घेण्याचा निर्णय घेतल्यावर काय होतं, याचं चित्रण सुंदरपणे करण्यात आलं आहे. २००४ मध्ये नागपूरच्या खुल्या कोर्टात २०० दलित महिलांनी गुंड, दरोडेखोर, सीरियल रेपिस्ट आणि खुनी असलेल्या अक्कू यादव याला मारून शिक्षा दिली. हा सिनेमा एका सत्य घटनेवर आधारित आहे. ‘200 हल्ला हो’ सार्थक दासगुप्ता आणि आलोक बत्रा यांनी दिग्दर्शित केला आहे. यात ज्येष्ठ अभिनेते अमोल पालेकर यांच्यासह , वरुण सोबती, इश्तियाक खान आणि साहिल खट्टर प्रमुख भूमिकेत आहेत.

तापसी पन्नूची प्रमुख भूमिका असलेला थप्पड हा सिनेमा घरगुती अत्याचार, राग, अहंकार याच्या विरोधात आवाज उठवतो. या सिनेमात तापसीने एका गृहिणीची भूमिका साकारली आहे, जिने कुटुंबासाठी तिच्या स्वप्नांचा त्याग केला आहे. सगळं काही सुरळीत सुरू असतं. परंतु एका पार्टीत तिचा नवरा तिला एक थप्पड मारतो आणि सगळं बदलतं. ती म्हणते ‘जरी ती नुसती थप्पड असली तरी तो मला मारू शकत नाही.’ सिनेमात हे अधोरेखित केलं आहे की फक्त एक थप्पड असली तरीही गप्प बसणं योग्य नाही. कारण कोणालाही तुम्हाला मारायचा अधिकार नाही. ‘थप्पड’ हा सिनेमा स्त्रीच्या आत्मसन्मानाची कथा आहे.


‘अज्जी’ हा सिनेमा बलात्कार आणि लैंगिक अत्याचारावर भाष्य करतो. एका वृद्ध महिलेच्या नातीवर स्थानिक राजकारण्याच्या मुलाकडून लैंगिक अत्याचार होतो, तेव्हा पोलीस तिला न्याय मिळवून देऊ शकत नाहीत. रागाच्या भरात तिने हे प्रकरण स्वतःच्या हातात घेण्याचा निर्णय घेतला.सुषमा देशपांडे ‘अज्जी’च्या भूमिकेत आहे. न्याय मिळवण्याचं काम ती स्वत: हातात घेते. शर्वणी सूर्यवंशी, अभिषेक बॅनर्जी, सादिया सिद्दीकी, विकास कुमार, मनुज शर्मा, सुधीर पांडे, किरण खोजे आणि स्मिता तांबे यांच्या चित्रपटात प्रमुख भूमिका आहेत.

मध्य प्रदेशातील वनक्षेत्रात नवीन डीएफओ रुजू झाली आहे. ही भूमिका विद्या बालनने साकारली आहे. गावात वाघिणीची भीती आहे. अनेक गावकऱ्यांना आपला प्राण गमवावा लागला आहे. वाघिणीला तसंच गावकऱ्यांना वाचवण्याचं आव्हान विद्या बालनने उचललं आहे. माणूस विरुद्ध जंगल या लढाईतही ती झुंजते आणि एक स्त्री म्हणून वाघिणीसारखी ताकदही दाखवते. या सिनेमात एक महिला अधिकारी म्हणून अनेक लोक तिच्या विरोधात उभे राहतात पण तरी ती शेरनीसारखी त्यांच्याशी लढते.

पगलैट

यात सान्या मल्होत्रा संध्या या तरुणीची भूमिका करत आहे. संध्याच्या नवऱ्याचं अस्तिकचं लग्नानंतर पाच महिन्यांतच निधन होतं आणि तिला काहीच वाटत नाही. ती दु:खात नाही. संध्याला कालांतराने कळतं तिच्या आणि आस्तिकच्या लग्नात प्रेम नव्हतंच. मग हळूहळू, ती त्याच्या एक्स गर्लफ्रेंडला भेटते आणि आपल्या नवऱ्याबद्दल जाणून घेण्याचा प्रयत्न करते. उमेश बिश्तच्या या सिनेमात सान्या मल्होत्राच्या उत्तम अभिनयाचं कौतुक करण्यात आलं आहे..

LEAVE A REPLY

Please enter your comment!
Please enter your name here