काही दिवसांपूर्वी युवराज हा अन्य क्रिकेटपटूंनी केलेल्या मदतीचे कौतुक करत होता. पण आता युवराज स्वत:हून या लढाईमध्ये उतरला आहे. यासाठी त्याने ५० लाख रुपयांची मदतही केली आहे.
युवराजने याबाबत एक ट्विट केले आहे. यामध्ये युवराज म्हणाला की, ” जोपर्यंत आपण एकजूट होत नाही तोपर्यंत आपण ही लढाई जिंकू शकत नाही. त्यामुळे आज रात्री ९ वाजता सर्वांनी एकजूट दाखवायला हवी, हे आवाहन मी देशवासियांना करत आहे. त्याचबरोबर पंतप्रधान मदत निधीसाठी मी ५० लाख रुपयेही देत आहे.”
हरभजन करतोय ५ हजार कुटुंबियांना मदत
सध्याच्या घडीला भारतामध्ये २१ दिवसांसाठी लॉकडाऊन करण्यात आले आहे. त्यामुळे समाजातील आर्थिक दुर्बल घटकांवर उपासमारीची वेळ आली आहे. पण या गरजूंना अन्न-धान्य मिळावे यासाठी भारताचा फिरकीपटू हरभजन सिंग पुढे सरसावला आहे. तब्बल पाच हजार कुटुंबियांना तो अन्न-धान्य पुरवत असल्याचे दिसत आहे.
पंजाबमधील जालंधर येथे सध्या बिकट अवस्था आहे. कारण बहुतांशी लोकांना अन्न-धान्याचा पुरवठा झालेला नाही आणि त्यामुळेच त्यांच्यावर उपासमारीची वेळ येऊ शकते. पण या कुटुंबियांसाठी हरभजन हा देवदूत ठरला आहे. जालंधर येथील पाच हजार कुटुंबियांच्या अन्न-धान्याच्या प्रश्न हरभजनने सोडवला आहे.
याबाबत हरभजन म्हणाला की, ” सध्याच्या घडीला काही कुटुंबियापुढे अन्न-धान्याचा प्रश्न बिकट होत चालला होता. या गरजू लोकांना मदत करण्यासाठी मी आणि पत्नी गीता यांनी पुढाकार घेतला आहे. जालंधर येथील पाच हजार लोकांना अन्न-धान्य कसं मिळेल, याची जबाबदारी आम्ही घेतली आहे. या पाच हजार कुटुंबियांचा अन्न-धान्याचा प्रश्न आम्ही तुर्तास सोडवला आहे. यापुढेही असे काम करण्याची ताकद मला मिळो, हीच प्रार्थना आहे.”
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
