वृत्तसंस्था, एलव्हिव्ह :

रशियाच्या आक्रमणानंतर युक्रेनच्या शहरांमधून लाखो नागरिकांनी स्थलांतर केले. शहरांमधून नागरिकांनी भरलेल्या बस बाहेर पडत असल्याचे चित्र मंगळवारी दिसून येत होते. युक्रेनमधील निर्वासितांची संख्या २० लाखांपर्यंत पोहोचल्याचे अधिकाऱ्यांनी सांगितले.

रशियाने युक्रेनवर आक्रमण केल्यानंतर, दुसऱ्या महायुद्धानंतरच्या युरोपातीस सर्वांत मोठ्या युद्धाचा भडका उडाला आहे. राजधानी कीव्हसह प्रमुख शहरांना रशियाने लक्ष्य केले आहे. त्यामुळे, शहरांमध्ये अन्न, पाणी आणि औषधांचा तुटवडा भासत आहे. रशियाने हल्ले तीव्र केल्यानंतर नागरिकांनी शहरातून बाहेर पडत आहे. पूर्वेकडील सुमी शहर आणि मारीपोल या बंदरातून नागरिकांनी भरलेल्या बस दिसून येत होत्या. ‘सुमी शहरातून ग्रीन कॉरिडॉर देण्यात आला आहे. त्यामुळे, तेथे अडकलेल्या नागरिकांच्या सुटकेचा पहिला टप्पा सुरू झाला आहे,’ असे युक्रेन सरकारकडून ट्वीटमध्ये म्हटले आहे. अनेक बस अन्य शहरांकडे जात असल्या, तरीही बहुतांश नागरिक देशातून बाहेर पडण्याला प्राधान्य देत असल्याचे सांगण्यात आले. संयुक्त राष्ट्रांच्या स्थलांतरांच्या संघटनेचे प्रवक्ते सफा एमसेहली यांनी केलेल्या ट्वीटप्रमाणे युक्रेनच्या २० लाख नागरिकांनी देश सोडला आहे.

‘कीव्हच्या उपनगरांमध्ये जोरदार बॉम्बफेक सुरू आहे. दिवस-रात्र होत असलेल्या बॉम्बच्या वर्षावांमुळे मृतदेहही ताब्यात घेता आलेले नाहीत. भटकी कुत्री मृतदेहांभोवती फिरत असून, हे चित्र खूपच विदारक आहे,’ अशी प्रतिक्रिया कीव्हचे महापौर अनातोल फेडोरुक यांनी व्यक्त केली.

Watch Video: जगणार आणि मरणारही तुझ्यासोबतच! युद्धभूमीवर फुलले प्रेमाचे अंकुर…
Ukraine Crisis: युक्रेनच्या महिला स्वस्त आणि सेक्सी; ‘महिला दिनी’ नेत्याच्या ‘दरिद्री’ विचारांची पोलखोल

५२ भारतीय खलाशांची मायकोलिव्हमधून सुटका

मायकोलिव्ह बंदरावर अडकलेल्या ७५ भारतीय खलाशांपैकी ५२ जणांची सुटका करण्यात भारतीय दूतावासाला यश आले आहे. उर्वरित २३ खलाशांची सुटका करण्यासाठी पुन्हा एकदा प्रयत्न करण्यात येणार आहे. या खलाशांबरोबरच लेबॅनॉनचे दोन आणि सीरियाच्या तीन जणांची सुटका करण्यात आली. या सर्वांना एका बसमधून बाहेर काढण्यात आल्याची माहिती भारतीय दूतावासाने ट्विटरवरून दिली आहे. ‘ऑपरेशन गंगा’मधून आतापर्यंत १७ हजार १०० जणांची सुटका करण्यात आली आहे.

‘भारतावर निर्बंध मूर्खपणाचे ठरेल’

भारत हा अमेरिकेचा महत्त्वाचा सहकारी देश आहे. त्यामुळे, रशियाकडून एस-४००सारखी क्षेपणास्त्रविरोधी प्रणाली घेतल्यावरून भारतावर निर्बंध लादणे मूर्खपणाचे ठरेल, अशी प्रतिक्रिया अमेरिकेतील सिनेटर टेड क्रुझ यांनी व्यक्त केली आहे. अमेरिकेच्या कायद्यानुसार, रशिया, इराण, उत्तर कोरिया यांसारख्या देशांकडून मोठ्या प्रमाणात व्यवहार केल्यास, त्या देशावर कडक निर्बंध लादता येतात. रशियाने २०१४मध्ये क्रायमिया गिळंकृत केल्यानंतर आणि २०१६च्या अध्यक्षीय निवडणुकीतील हस्तक्षेपावरून अमेरिकेने रशियाकडून शस्त्रखरेदी करणाऱ्या देशांवर निर्बंध लादण्याचा निर्णय घेतला आहे.

‘भारतासाठी रशियाशी मैत्री अपरिहार्य’

रशियाबरोबरील संबंध ही भारतासाठी अपरिहार्यता आहे, असे सांगून अमेरिकेचे माजी राजनैतिक अधिकारी अतुल केशाप यांनी भारताच्या तटस्थ राहण्याच्या निर्णयाचे समर्थन केले आहे. रशियाविरोधातील संयुक्त राष्ट्रांमधील दोन मतदानामध्ये भारताने तटस्थ राहण्याचा निर्णय घेतला आहे. त्यामुळे, अमेरिकेतील लोकप्रतिनिधींनी भारतावर टीका सुरू केली आहे. या पार्श्वभूमीवर, केशाप यांनी भारताचे समर्थन केले आहे.

Ukraine Crisis: मानवी कॉरिडॉरचे उल्लंघन, रशिया-युक्रेनचे परस्परांवर आरोप
Ukraine Crisis: युक्रेन जवानांच्या जिद्दीनं भारावला भारतीय तरुण, रशियाविरुद्ध युद्धात सहभागी

LEAVE A REPLY

Please enter your comment!
Please enter your name here