वरळी, प्रभादेवीत सर्वाधिक करोनाग्रस्त

करोनाच्या संसर्गाचा विळखा संपूर्ण मुंबईला बसण्यास सुरुवात झाली आहे. मुंबईच्या विविध भागांत करोनाचा शिरकाव झाला असून, पालिकेच्या आकडेवारीनुसार वरळी, प्रभादेवी परिसरात सर्वाधिक ५८ करोना पॉझिटिव्ह रुग्ण आढळले आहेत. तर फोर्ट भागात इतर विभागापेक्षा कमी रुग्ण सापडल्याची नोंद झाली आहे.

राज्यासह मुंबईत करोनाचे रोज नवीन रुग्ण सापडत असून, यात मुंबईचे रुग्ण जास्त आहेत. हा संसर्ग मुंबईच्या विविध भागांत पसरत असल्याने पालिका प्रशासन चिंतेत आहे. मुंबईत आतापर्यंत ३७७ हून अधिक रुग्ण सापडले आहेत. त्यापैकी जी-दक्षिण विभागातील वरळी, प्रभादेवी येथे सर्वाधिक ५८ रुग्ण सापडले आहेत. वरळी कोळीवाडा आणि धारावी झोपडपट्टी भागांत सापडलेले करोना रुग्ण सध्या चिंतेचा विषय ठरले आहेत.

वरळी, प्रभादेवी हे परिसर कॉर्पोरेट ऑफिसेस असलेले विभाग म्हणून ओळखण्यात येत असले, तरी या भागांत झोपडपट्ट्यादेखील आहेत. बीडीडी चाळी, बेस्ट वसाहत, पोलिस कॅम्प या वसाहतींची अवस्था दयनीय आहे. जी-दक्षिण विभागात हे सर्व भाग मोडतात. येथे करोनाचे सर्वाधिक ५८ रुग्ण सापडले आहेत. यापैकी वरळी कोळीवाडा वसाहत सील करण्यात आली आहे.

मशिद बंदरमध्ये दोन रुग्ण

कार्यालये, छोटे उद्योग अधिक आणि रहिवासी वस्ती कमी असलेल्या मशिद बंदर ‘बी’ विभागात सर्वात कमी म्हणजे फक्त दोन रुग्ण सापडले आहेत. ग्रँट रोड ‘डी’ विभागात ३१, तर अंधेरी पश्चिम ‘के पश्चिम’ आणि ‘के पूर्व’ विभागात अनुक्रमे २५ आणि २४ करोनाबाधित रुग्ण सापडले असल्याची माहिती पालिकेकडून देण्यात आली आहे.