कोल्हापूर : ‘भरपूर अभ्यास कर… मोठा हो’, असं म्हणत नेहमीच प्रोत्साहन देणाऱ्या वडिलांना सकाळी अचानक मृत्यूने गाठले. ११ वाजता १२ वीचा पेपर आणि सकाळी वडिलांच्या मृत्यूने कोसळलेला दु:खाचा डोंगर अशा विचित्र कात्रीत तो सापडला. तरीही काळजावर दगड ठेवत त्याने पेपर दिला. पेपर संपताच त्याने हंबरडा फोडत वडिलांवर अंत्यसंस्कार केले. ही दुर्देवी घटना आहे कागल तालुक्यातील मुरगूडची आणि हा दुर्देवी मुलगा आहे गणेश महादेव कांबळे. (Kolhapur News)

मुरगूड येथील महादेव कांबळे हे नगरपालिकेत सफाई कामगार होते. मुलाने भरपूर शिकावं, मोठं व्हावं यासाठी त्यांची सतत धडपड असायची. यामुळे नोकरी करता काही व्यवसाय करत ते संसाराला हातभार लावायचे. वयाच्या ६४ व्या वर्षी गुरुवारी सकाळी हृदयविकाराचा तीव्र झटका आला. त्यांना तातडीने उपचारासाठी कोल्हापुरातील एका रूग्णालयात दाखल करण्यात आले. मात्र उपचार सुरू असतानाच त्यांनी जगाचा निरोप घेतला.

missile fired accidentally : भारताचे सुपरसॉनिक क्षेपणास्त्र पाकिस्तानमध्ये कोसळले, संरक्षण मंत्रालयाने म्हटले…

महादेव कांबळे यांचा मुलगा गणेश हा शिवराज कॉलेजमध्ये १२ वीत शिकतो. सकाळी त्याचा भौतिकशास्त्राचा पेपर होता. पेपरला जाण्यापूर्वीच त्याला वडिलांच्या निधनाची बातमी कळाली. त्याच्यावर दु:खाचा डोंगरच कोसळला. एकीकडे वडिलांचा अचानक झालेला मृत्यू आणि दुसरीकडे १२ वीचा पेपर या कात्रीत तो अडकला. तेव्हा कॉलेजमधील शिक्षकांनी त्याची समजूत काढली आणि त्याला पेपरला पाठवलं.

शिक्षकांच्या विनंतीनुसार काळजावर दगड ठेवत तो पेपरला गेला. ३ तास त्याने पेपर सोडवला. पेपर पूर्ण होईपर्यंत वडिलांचे अंत्यसंस्कार थांबविण्यात आले. गणेश परीक्षा देऊन येताच कोल्हापूरहून आणलेल्या पित्याच्या मृतदेहावर कोसळत तो धाय मोकलून रडला. त्यामुळे सर्वांनाच हुंदका फुटला. शोकाकूल वातावरणात महादेव कांबळे यांच्यावर अंत्यसंस्कार करण्यात आले.

LEAVE A REPLY

Please enter your comment!
Please enter your name here