मुंबई पोलिसांच्या सायबर शाखेने ११ मार्चला नोटीस बजावली असून, चौकशीसाठी बीकेसी येथे बोलावले आहे, अशी माहिती आज, शनिवारी देवेंद्र फडणवीस यांनी स्वतः दिली. आपण उद्या बीकेसीत जाणार असून, या पोलीस बदली घोटाळ्याच्या तपासात योग्य ते उत्तर देऊ, असे फडणवीस यांनी सांगितले. त्याचवेळी मला याबाबत माहिती कशी मिळाली, कुठून मिळाली, याचे स्रोत सांगणे बंधनकारक नाही. विरोधी पक्षनेता म्हणून मला विशेषाधिकार आहेत, असे फडणवीस यांनी सांगितले.
सायबर पोलीसांची नोटीस; विरोधी पक्षनेते देवेंद्र फडणवीस म्हणाले…
एसटी सुरू करण्यासाठी सरकारच्या हालचाली; १० हजार कंत्राटी कामगारांची भरती
फडणवीस यांना पोलिसांनी बजावलेल्या नोटिशीनंतर भाजप आक्रमक झाला आहे. फडणवीसांना समर्थन देण्यासाठी भाजपचे कार्यकर्ते बीकेसीत शक्तिप्रदर्शन करणार आहेत, असं प्रवीण दरेकर यांनी सांगितलं. ते म्हणाले की, पोलीस बदली घोटाळा प्रकरणात बीकेसीतील सायबर पोलिसांनी त्यांना नोटीस बजावली आहे. फडणवीस यांनी विधानसभेत सरकारी षडयंत्राचा पर्दाफाश केला. त्यामुळे हे महाविकास आघाडीचे सरकार हादरले आहे. महाविकास आघाडीचे नेतेही हादरून गेले आहेत. सरकार अडचणीत येत असल्याचे लक्षात आल्याने नेते सैरावैरा पळायला लागले आहेत. त्याला सामोरे जावे लागत असल्याने मग भाजपचं जे शक्तिस्थान, नेतृत्व आहे. त्याला हात घालता येतं का? देवेंद्र फडणवीस हे कुठल्याही घोटाळ्यात सामील नाहीत. कुठल्याही अनधिकृत गोष्टींमध्ये ते सापडू शकत नाहीत. अशा वेळी असं कुठलं तरी फुटकळ कारण देऊन नोटीस बजावली आहे. विरोधी पक्षनेता म्हणून देवेंद्र फडणवीसांचे विशेषाधिकार आहेत. तथापि देवेंद्र फडणवीस हे वकील आहेत. कायद्याचा सन्मान ते करत आहेत. त्यामुळे उद्या ते ११ वाजता रितसर जाऊन उत्तरे देतील. यानंतर येणाऱ्या काळात सूडभावना, षडयंत्र या सगळ्या गोष्टी समोर येतील, असेही दरेकर म्हणाले.
फडणवीसांना बजावलेल्या नोटिशीनंतर मंत्री जयंत पाटील यांनी प्रतिक्रिया दिली होती. या नोटिशीबद्दल माझ्याकडे काही माहिती नाही आणि सूडभावनेने नोटीस बजावली नाही, असे ते म्हणाले होते. त्याबाबतही दरेकर यांनी माहिती दिली. एकीकडे नोटीस बजावली आहे हे माहीत नाही असे ते सांगतात आणि दुसरीकडे सूडभावनेने कारवाई केली नाही असेही सांगत आहेत. सरकार कशा पद्धतीने वागतंय हे महाराष्ट्र पाहतोय. फडणवीसांनीही सर्व काही उघड केलेले आहे. येणाऱ्या काळात न्यायव्यवस्थेकडे हे प्रकरण जाईल. त्याचा निकाल लागेल. मग यात सूडभावना आहे, की प्रेमभावना आहे, हे जनतेसमोर येईलच, असे दरेकर म्हणाले.
कोकणात धक्कादायक प्रकार, शिमगोत्सवाच्या बैठकीत असं काही घडलं की नागरिकांमध्ये भीती
