जळगाव : सत्ताधारी महाविकास आघाडी विरुद्ध भाजप हा राजकीय संघर्ष वाढत असताना दोन्ही बाजूचे नेते एकमेकांवर आक्रमक टीका करत असल्याचं पाहायला मिळत आहे. शिवसेनेचे नेते आणि मंत्री गुलाबराव पाटील यांनी पुन्हा एकदा भाजपचे माजी खासदार निलेश राणे यांच्यावर खरमरीत शब्दांत टीकास्त्र सोडलं आहे. (Gulabrao Patil On Nilesh Rane) ‘निलेश राणे कोण आहेत? हे निलेश राणे म्हणजे आम्ही जन्माला घातलेलं पिल्लू आहे. ते काय आम्हाला शिकवणार?’ अशा शब्दांत गुलाबराव पाटील यांनी राणे यांचा खरपूस समाचार घेतला आहे.
जळगाव तालुक्यातील चिंचोली येथे वीज उपकेंद्राचा भूमिपूजन सोहळा मंत्री गुलाबराव पाटील यांच्या हस्ते पार पडला. या कार्यक्रमानंतर गुलाबराव पाटील हे पत्रकारांशी बोलत होते. यावेळी कार्यक्रमाला ऑनलाईन पद्धतीने राज्याचे ऊर्जामंत्री नितीन राऊत यांची उपस्थिती होती. गुलाबराव पाटील यांच्यासारखे खंबीर नेतृत्व जिल्ह्याला लाभले असल्याचं सांगत नितीन राऊत यांनी ऑनलाईन मनोगतात गुलाबराव पाटील यांच्यावर स्तुतीसुमने उधळली. नगरमध्ये नवा राजकीय ट्विस्ट?; बाळा नांदगावकरांनी घेतली विखे आणि गडाखांची भेट
रत्नागिरी येथील कार्यक्रमात विधानसभेचे विरोधी पक्षनेते देवेंद्र फडणवीस हे सर्वांना पुरून उरतील, असे अनेक ठाकरे आणि पवार ते खिशात घेऊन फिरतात, असं वक्तव्य निलेश राणे यांनी केलं होतं. या वक्तव्याचा मंत्री गुलाबराव पाटील यांनी चांगलाच समाचार घेतला.
फडणवीसांच्या चौकशीबाबत काय म्हणाले पाटील?
माजी मुख्यमंत्री देवेंद्र फडणवीस यांना पोलिसांकडून नोटीस पाठवण्यात आल्याने त्या निषेधार्थ राज्यभरात भाजप आंदोलन करत आहे. याबाबत मंत्री गुलाबराव पाटील यांना विचारले असता ते म्हणाले की, ‘आंदोलन करण्याचा सर्वांनाच अधिकार आहे. फडणवीस यांच्यासोबत काही चुकीचं झालं असेल असं भाजप कार्यकर्त्यांना वाटत असेल म्हणून ते आंदोलन करत आहेत. आंदोलन करणं चुकीचं नाही, मात्र या आंदोलनाचा नागरिकांना कुठलाही त्रास होऊ नये, रुग्णवाहिका असो की प्रवासी वाहने रोखून नागरिकांना वेठीस धरू नये,’ असं गुलाबराव पाटील यांनी म्हटलं आहे.
नगरमध्ये नवा राजकीय ट्विस्ट?; बाळा नांदगावकरांनी घेतली विखे आणि गडाखांची भेट
