चित्रपटाच्या कथा ही विज्ञान, ज्योतिष, भविष्य आणि कर्म या संकल्पनांभोवती फिरणारी आहे. विज्ञान आणि ज्योतिष याबाबत विविध मतमतांतरं असणारे अनेक गट आजही पाहायला मिळतात. त्यावर चर्चा आणि वादही होतात. चित्रपटात अशीच शास्त्रज्ञांची एक टीम वैदिक संस्था चालविणारे गुरू परमहंस (सत्याराज) यांच्याकडे जाते. हस्तरेषा भाकितं आणि भविष्य याबद्दल असणाऱ्या त्यांच्या ज्ञान वा विश्वासाबद्दल ही मंडळी प्रश्न उपस्थित करतात. इथंच कथेचा नायक विक्रमादित्य (प्रभास) याची ओळख आपल्याला होते. हा विक्रमादित्य ‘भारताचा नॉस्ट्राडॅमस’ म्हणून ओळखला जात असतो आणि ज्यानं वर्तवलेलं भविष्य कधीच चुकीचं ठरत नसतं. आपल्या हातावर प्रेमाची रेषाच नसल्यानं, असं काही आपल्याबद्दल घडणार नाही, यावर त्याचा विश्वास असतो आणि म्हणूनच त्याला प्रेमाचं नातंही नको असतं. यातच त्याच्या आयुष्यात डॉ. प्रेरणा () येते. विक्रम तिच्या हातावरील रेषा पाहून तिच्या उज्ज्वल भविष्याचं भाकित वर्तवतो. प्रत्यक्षात अशा काही घटना घडतात, की तिच्या आयुष्याची दिशाच बदलून जाते. हा घटनाक्रम नेमका काय आहे आणि हे दोघं ‘राधे श्याम’ का ठरतात, ते चित्रपट पाहिल्यावर कळेल.
विज्ञान हे शंभर टक्के तंतोतंत नसतं आणि तुमचं नशीब बदलण्यासाठी वेळोवेळी लहान-सहान का होईना संधी तुम्हाला मिळत असतात, हे ही कथा सांगू पाहते. या पार्श्वभूमीवर प्रेमकथेची मांडणी केलेली असली, तरी पटकथा आणि दिग्दर्शनातल्या उणीवांमुळे चित्रपट अपेक्षित परिणाम साधत नाही. प्रभास आणि पूजा यांची केमिस्ट्री उत्तम जमलेली दिसते आणि त्यांचा अभिनयही समर्पक. मात्र त्यांच्या भूमिका लिहीताना ‘हे असे का आहेत’ हेच स्पष्ट नसल्यानं भूमिका ठसत नाहीत. चित्रपटातले अनेक प्रसंग का आणि कशासाठी आहेत, असा प्रश्न पडत राहतो. काही कलावंतांच्या भूमिकांबाबतही तेच म्हणावं लागेल. त्यातही प्रसिद्ध अभिनेत्री यांची भूमिका लक्षात राहते. सचिन खेडेकर, जगपती बाबू, मुरली शर्मा, कुणाल रॉय कपूर, रिद्धी कुमार यांनीही आपापाल्या भूमिकांना न्याय दिला आहे. चित्रपटातल्या प्रसंगांचं चित्रीकरण, व्हीएफएक्स हे सगळं देखणं झाल्यानं ही ‘व्हिज्युअल ट्रीट’ नक्कीच ठरते. चित्रपटाचं संगीतही कथेशी एकरूप होणारं आहे. काही गाणी सिंगल्सच्या जमान्याची आठवण करून देणारी. हे सगळं बांधीव पटकथेच्या चौकटीत बांधलं गेलं असतं, तर चाहत्यांना एक उत्तम अनुभूती देणारी प्रेमकथा पाहायला मिळाली असती. प्रभासचे चाहते असाल, तर चित्रपट पाहायचा की नाही, हा निर्णय तुम्ही घ्यायचा आहे.
राधे श्याम
निर्माते ः भूषणकुमार, प्रमोद उप्पलापती, वामसी कृष्णा
लेखक-दिग्दर्शक ः राधाकृष्ण कुमार
कलाकार ः प्रभास, पूजा हेगडे, भाग्यश्री पटवर्धन, सचिन खेडेकर, सत्यराज, मुरली शर्मा व इतर
संगीत ः मिथुन, अमाल मलिक, मनन भारद्वाज
छायांकन ः मनोज परमहंस
संकलन ः कोटागिरी व्यंकटेश्वर राव
दर्जा ः अडीच स्टार
