उस्मानाबाद : राज्य मंत्रीमंडळामध्ये उस्मानाबाद जिल्ह्याचे तीन जावई आहेत. ४ पैकी ३ आमदार सत्ताधारी पक्षाचे आहेत. तरी देखील दुर्लक्षितच असल्याची खंत अर्थसंकल्पावरील चर्चेदरम्यान बोलताना भाजप आमदार राणाजगजितसिंह पाटील यांनी विधानसभेत व्यक्त केली.

सोलापुर-तुळजापुर-उस्मानाबाद रेल्वे मार्गासाठी राज्य सरकारने एक रुपयाचीही तरतुद केलेली नाही. केंद्र सरकारने रु. ३२ कोटी दिले आहेत. राज्य सरकारने देखील समप्रमाणातील वाटा उपलब्ध करुन देणे गरजेचे आहे. राज्यातील १८ जिल्ह्यात नविन महिला रुग्णालय व नवजात शिशु रुग्णालयाची घोषणा झाली. काही रुग्णालयाच्या श्रेणीवर्धणाची घोषणा झाली. परंतु यात उस्मानाबादचा उल्लेख नाही. उस्मानाबाद येथील महिला रुग्णालयाची क्षमता ६० खाटांची असुन १५० हुन अधिक रुग्ण उपचार घेत असतात. रुग्णांवर जमिनीवर गादी टाकुन उपचार केले जातात, त्यामुळे २०० खाटांच्या रुग्णालयाला मान्यता देऊन निधी उपलब्ध करुन द्यावा, अशी मागणी यावेळी आ.राणाजगजितसिंह पाटील यांनी विधानसभेत केली.

कौडगाव एम.आय.डी.सी. मध्ये १५०० एकर जमीन उपलब्ध आहे. दोन वर्षे होऊन देखील तेथील सौर उर्जा प्रकल्प अर्धवट आहे. उद्योग खात्यांचे मंत्री उस्मानाबादला कधी आले नाहीत. वारंवार मागणी करुन देखील बैठक घेतली जात नाही. केंद्र सरकार येथे टेक्नीकल टेक्सटाईल पार्क उभारण्यास तयार आहे, मात्र राज्याकडुन प्रस्तावच जात नाही. वैद्यकीय महाविद्यालयासाठी देखील केवळ रु.९.४ कोटीची तरतूद करण्यात आली आहे. यासाठी जास्तीचे पैसे उपलब्ध व्हावेत, बारामती येथील वैद्यकीय महाविद्यालय प्रमाणेच सुसज्ज महाविद्यालय उभारण्याची मागणीही त्यांनी चर्चेदरम्यान केली.

शेतकऱ्यांच्या जिव्हाळ्याच्या पिक विमा विषयावर बोलतांना त्यांनी राज्‍य तक्रार निवारण समितीने आजवर बैठकच घेतली नसल्याचे विधानसभा अध्यक्षांच्या निदर्शनास आणून दिले. कृषी मंत्र्यांनी हा विषय समजून घेतला असता तर शेतकऱ्यांना न्याय मिळाला असता, बैठकच झाली नाही त्यामुळे हा विषय समजून घेण्याची विनंती त्यांनी यावेळी केली.

विरोधी पक्षनेते देवेंद्र फडणवीस यांनी विकास निधीमधील मोठी तफावत सभागृहाच्या निदर्शनास आणून दिली. जिल्हा वार्षिक योजना (सर्व साधारण) आराखडयामध्ये मुंबईसाठी १३०% वाढ करण्यात आली असून उस्मानाबादसाठी मात्र केवळ १५% वाढ केल्याचे त्यांनी सभागृहामध्ये स्पष्ट केलं होतं.

LEAVE A REPLY

Please enter your comment!
Please enter your name here