अहमदनगर : होळी, धुलीवंदन, शिवजयंती आणि रंगपंचमी या सणांच्या पार्श्वभूमीवर अहमदनगर शहर व जिल्ह्यात प्रतिबंधात्मक आदेश जारी करण्यात आले आहेत. सार्वजनिक शांतता, कायदा व सुव्यवस्था अबाधित राखणे तसंच करोना विषाणूच्या ओमिक्रॉन व्हेरिएंटचा प्रादुर्भाव वाढू नये यासाठी जिल्हाधिकारी (Ahmednagar Collector) डॉ.राजेंद्र भोसले यांनी जिल्ह्यात प्रतिबंधात्मक आदेश लागू करण्याच्या सूचना दिल्या आहेत.

राज्यातील इतर जिल्ह्यांप्रमाणे अहमदनगरमध्येही १७ मार्च रोजी ‘होळी’, १८ मार्च रोजी ‘धुलीवंदन’, २१ मार्च रोजी तिथीप्रमाणे ‘शिवजयंती’ आणि २२ मार्च रोजी रंगपंचमी हे सण साजरे केले जाणार आहेत. सध्या करोना विषाणूच्या ओमिक्रॉन व्हेरिएंटचा प्रादुर्भाव वाढण्याचा धोका पुन्हा निर्माण झाला आहे. सदर उत्सवांच्या दरम्यान गर्दी होण्याची शक्यता नाकारता येत नाही. तसंच जिल्ह्यामध्ये विविध मोर्चे, धरणे आंदोलने, रास्ता रोको होतात. या पार्श्वभूमीवर जिल्ह्यात कायदा व सुव्यवस्थेचा प्रश्न निर्माण होऊ नये किंवा तशी परिस्थिती निर्माण झाल्यास ती परिस्थिती हाताळण्यासाठी पोलिसांना मदत व्हावी म्हणून संपूर्ण अहमदनगर शहर व जिल्ह्यात १७ मार्च ते २२ मार्च २०२२ या कालावधीत महाराष्ट्र पोलीस अधिनियम १९५१ चे कलम ३७ (१) (३) चे प्रतिबंधात्मक आदेश जारी जारी करण्यात आले आहेत.

धक्कादायक! ‘तो’ लग्न करणार होता, वाद झाल्यानंतर भिंतीवर डोके आपटून केली महिलेची हत्या

जिल्ह्यात प्रतिबंधात्मक आदेश असताना शस्त्रे, काठ्या, तलवारी, भाले, सुरे, बंदुका किंवा शारीरिक इजा करण्यासाठी वापरता येईल अशी कोणतीही वस्तू बरोबर नेणे, दगड किंवा इतर क्षेपणास्त्रे किंवा क्षेपणास्त्रे सोडावयाची किंवा फेकावयाची उपकरणे व साधने जवळ बाळगणे किंवा तयार करणे किंवा जमा करणे, कोणत्याही व्यक्तींच्या आकृत्या किंवा त्यांच्या प्रतिमेचे प्रदर्शन करणे, कोणताही दाहक पदार्थ किंवा स्फोटक जवळ बाळगणे किंवा तयार करणे, जाहीरपणे घोषणा देणे, गाणे म्हणणे, वाद्य वाजवणे ध्वनिवर्धक किंवा ध्वनीक्षेपक यासारखे मानवी आवाजाचे वर्धन करणारा किंवा तो जसाच्या तसा ऐकवणारा उपकरण संच वापरणे किंवा वाजवणे, सभ्यता किंवा नितीमत्ता यास धक्का पोहोचेल किंवा शांतता धोक्यात येईल असे कोणतेही कृत्य करणे, आवेशपूर्ण भाषणे करणे, हावभाव करणे किंवा सोंग आणणे किंवा तशी चित्रे, चिन्हे किंवा इतर वस्तू तयार करणे किंवा त्यांचा प्रचार करणे यास प्रतिबंध करण्यात आला आहे.

दरम्यान, सदर प्रतिबंधात्मक आदेशातून शासकीय सेवेत असणाऱ्या कर्मचाऱ्यांना आणि इतर काही घटकांना सूट देण्यात आली आहे.

LEAVE A REPLY

Please enter your comment!
Please enter your name here