कोल्हापूर : कोल्हापूर उत्तर विधानसभा पोटनिवडणुकीसाठी भाजपचा उमेदवार निश्चित झाला असून भाजपला रोखण्यासाठी जयश्री जाधव यांच्याऐवजी पर्यायी नावांचा काँग्रेसने विचार सुरू केल्याचे समजते. त्यामध्ये माजी आमदार मालोजीराजे व सागर चव्हाण यांची नावे पुढे आली आहेत. दरम्यान, या पोटनिवडणुकीतून (Kolhapur North Assembly Constituency) शिवसेनेने माघार घेतली असून काँग्रेसला जाहीर पाठिंबा देण्याची भूमिका घेतली आहे.

काँग्रेसचे आमदार चंद्रकांत जाधव यांच्या निधनाने कोल्हापूर उत्तरची जागा रिक्त झाली आहे. या जागेवर त्यांच्या पत्नी जयश्री यांना उमेदवारी देण्याचं निश्चित करून दोन महिने काँग्रेसने तशी तयारी सुरू केली आहे. पण भाजपने ही निवडणूक अतिशय ताकदीने लढवण्याचे ठरवत माजी नगरसेवक सत्यजीत कदम यांना मैदानात उतरवण्याचं ठरवलं आहे. यामुळे जाधव विरुद्ध कदम अशी लढत होईल, असं आतापर्यंत म्हटलं जात होतं. पण गेल्या चार-पाच दिवसात वेगवेगळ्या चर्चेने निवडणुकीत रंगत आली आहे.

धुलिवंदन सणाला गालबोट: डीजेसमोर नाचताना धारदार शस्त्रांनी वार; ७ ते ८ जण गंभीर जखमी

दुरंगी लढत महाविकास आघाडीला सोपी जाईल असं आतापर्यंत नेत्यांना वाटत होते. जाधव यांना सहानुभूती मिळेल आणि त्या सहज विजयी होतील, अशी चर्चा होती. पण, ते फार सोपे नसल्याचं लक्षात आल्याने उमेदवार बदलापासून ते तिरंगी लढत करण्यापर्यंतच्या हालचालींना वेग आला आहे. भाजपला रोखण्यासाठी जे सोयीचे होईल, ते करण्याचे पालकमंत्री सतेज पाटील यांचे प्रयत्न आहेत. काँग्रेसचे जिल्हाध्यक्ष आणि पालकमंत्री म्हणून त्यांची प्रतिष्ठा पणाला लागली आहे. त्यामुळे काहीही करून ही जागा कायम ठेवण्यासाठी त्यांची व्यूहरचना सुरू आहे. त्याचाच एक भाग म्हणून उमेदवार बदलण्याच्या हालचाली सुरू असल्याचे कळते. यातून माजी आमदार मालोजीराजे, मधुरिमाराजे, माजी महापौर सागर चव्हाण यांची नावे चर्चेत आली आहेत.

महाविकास आघाडीच्या निर्णयानुसार पोटनिवडणुकीची ही जागा काँग्रेसला जाते. पण, ही जागा लढविण्यासाठी शिवसेनेचा आग्रह सुरू होता. या मतदारसंघात सेनेचा मोठा प्रभाव आहे. २५ वर्षे सेनेचा झेंडा फडकल्याने माजी आमदार क्षीरसागर यांनी मैदानात उतरण्याचा चंग बांधला होता. मात्र आता शिवसेनेनं माघार घेत काँग्रेसला पाठिंबा दिला आहे.

दरम्यान, भाजपचे प्रदेशाध्यक्ष चंद्रकांत पाटील यांचीही या निवडणुकीत प्रतिष्ठा पणाला लागली आहे. पक्षाचे राज्यपातळीवरील नेतृत्व करताना जिल्ह्यात एकही भाजपचा आमदार निवडून आला नाही, हे शल्य पक्षाला आहे. त्यामुळे काहीही करून भाजपच्या विजयासाठी रान उठवण्याचे त्यांचे नियोजन आहे. त्यासाठी पक्षाची सारी फौज या कामात गुंतवण्याचा निर्धारच त्यांनी केला आहे. या सर्व पार्श्वभूमीवर सध्या कोल्हापुरातील राजकीय वातावरण चांगलंच तापलं आहे.

kolhapur bjp candidate

सत्यजीत कदम

LEAVE A REPLY

Please enter your comment!
Please enter your name here