मुंबई: एमआयएम पक्षाचे खासदार इम्तियाज जलील यांनी महाविकास आघाडी सरकारला युतीची ऑफर देत महाराष्ट्राच्या राजकारणात नवा ट्विस्ट आणला होता. कालपासून राज्यात एमआयएम आणि महाविकास आघाडीच्या या संभाव्य युतीची जोरदार चर्चा सुरू आहे. इम्तियाज जलील यांनी तर महाविकास आघाडीशी युती करण्यासाठी आपण शरद पवार आणि मुख्यमंत्री उद्धव ठाकरे (CM Uddhav Thackeray) यांनाही भेटण्याची तयारी दाखवली आहे. या सगळ्या पार्श्वभूमीवर ‘ज्वलंत हिंदुत्वाचा’ पुरस्कार करणारी शिवसेना काय भूमिका घेते, याकडे सर्वांच्याच नजरा लागल्या होत्या. अखेर शिवसेना पक्षप्रमुख उद्धव ठाकरे यांनी रविवारी शिवसैनिकांशी संवाद साधताना आपली भूमिका स्पष्ट केली. एमआयएम ही भाजपची बी टीम आहे. अफजल गुरुला फाशी देऊ नको म्हणणाऱ्या मेहबुबा मुफ्तीसोबत सत्तेसाठी मांडीघाशी केली. तितका निर्लज्जपणा शिवसेनेत येणे शक्य नाही. मी तो कदापि येऊ देणार नाही. सत्ता मिळत असली तर एमआयएमसोबत जाणार नाही. त्यांच्याशी आघाडी करण्याचा प्रश्नच येत नाही, असे उद्धव ठाकरे यांनी म्हटले. त्यामुळे ठाकरे सरकार आणि एमआयएमच्या युतीच्या चर्चेला तुर्तास पूर्णविराम मिळाला आहे.
Uddhav Thackeray: उद्धव ठाकरे शिवसेनेच्या बैठकीत कडाडले, हिंदुत्वाच्या मुद्द्यावरून भाजपला सुनावलं
उद्धव ठाकरे यांनी रविवारी व्हीडिओ कॉन्फरन्सिंगच्या माध्यमातून शिवसेनेचे खासदार आणि पदाधिकाऱ्यांनी संवाद साधला. यावेळी त्यांनी भाजपचा चांगलाच समाचार घेतला. शिवसेनेने हिंदुत्व सोडलं, असा भ्रम निर्माण करण्याचा प्रयत्न भाजपकडून केला जात आहे. उद्या भाजपचे नेते हिंदू धर्म आम्हीच स्थापन केला, असे म्हणायलाही कमी करणार नाहीत. भाजपचे हिंदुत्व हे राजकारणापुरते असल्याची टीका केली. काश्मीरमध्ये मेहबुबा मुफ्ती यांच्यासोबत युती केली होती, याचा भाजपला विसर पडला का, असा सवालही त्यांनी उपस्थित केला. आम्ही ‘जनाब सेना’ मग तुम्हाला ‘हिजबुल सेना’ म्हणायचं का, असा सणसणीत टोलाही उद्धव ठाकरे यांनी भाजपला लगावला.

भाजपनेच ‘एमआयएम’च्या महाराष्ट्रातील नेत्याला महाविकासघाडीला युतीची ऑफर द्यायला सांगितली: संजय राऊत
‘मोहन भागवतांच्या नावापुढेही ‘खान’ लावणार का?’

उद्धव ठाकरे यांनी आपल्या आजच्या भाषणात सरसंघचालक मोहन भागवत यांच्या भाषणाचा दाखला देत भाजपला लक्ष्य केले. मुस्लिमांना विरोध करणारी व्यक्ती हिंदू असूच शकत नाही, अशा धाटणीचे विधान सरसंघचालकांनी केले होते. जर मला जनाब म्हणणार असाल तर तुमच्या सरसंघचालकांना काय बोलणार आहात? मोहन भागवतांच्या नावापुढे खान किंवा जनाब जोडणार आहात का, असा सवालही उद्धव ठाकरे यांनी भाजपला विचारला.

मुसलमानांविषयी भाजपने काही केलं तर ते देशप्रमे, आम्ही काही केलं तर तर तो देशद्रोह ठरतो. मग मेहबुबा मुफ्तीसोबत युती करणारे आणि अझहर मसूदला सोडणाऱ्या भाजपाल हिजबुल जनता पक्ष म्हणायचे का? एवढे घाणेरडे आरोप आम्ही केले नव्हते. आमच्यावर ती वेळ येऊ देऊ नका. पाकिस्तानात गेल्यानंतर जिनांच्या थडग्यावर नतमस्तक कोण झालं होतं? हा काळा इतिहास पाहून आम्ही अजूनही त्यांना भारतीय जनता पक्षच म्हणतोय, पाजपा म्हणजे पाकिस्तान जनता पक्ष म्हणत नाही, असा टोलाही उद्धव ठाकरे यांनी लगावला.

LEAVE A REPLY

Please enter your comment!
Please enter your name here