देहरादून : उत्तराखंडमध्ये काँग्रेसला धूळ चारत पुन्हा एकदा भाजपने विधानसभा निवडणुकीत बहुमत मिळवलं. त्यानंतर आज पुष्कर सिंह धामी यांनी मुख्यमंत्रिपदाची शपथ (Uttarakhand Chief Minister Pushkar Singh Dhami) घेतली. या शपथविधी सोहळ्याला पंतप्रधान नरेंद्र मोदी यांच्यासह अनेक दिग्गज नेते उपस्थित होते. मात्र या सोहळ्यात सर्वाधिक चर्चा झाली ती योगी आदित्यनाथ यांची. कारण या शपथविधी सोहळ्यात योगी मंचावर येताच नागरिकांकडून ‘बुलडोजर बाबा’ जिंदाबाद असा जोरदार जयघोष करण्यात आला.

पुष्कर सिंह धामी यांनी दुसऱ्यांदा उत्तराखंडच्या मुख्यमंत्रिपदाची शपथ घेतली. यावेळी सतपाल महाराज यांच्यासह एकूण ८ जणांनी कॅबिनेट मंत्रिपदाची शपथ घेतली.

…तर राजकारण सोडणार; अरविंद केजरीवाल यांचे भाजपला थेट आव्हान

भाजपचं जोरदार शक्तीप्रदर्शन

नुकत्याच झालेल्या पाच राज्यांच्या विधानसभा निवडणुकीनंतर चार राज्यांत बहुमत मिळवण्यात यशस्वी ठरलेल्या भाजपने उत्तराखंडमध्ये शपथविधी सोहळ्यावेळी मोठं शक्तीप्रदर्शन केलं. या शपधविधी सोहळ्याला पंतप्रधान नरेंद्र मोदी यांच्यासह भाजपचे राष्ट्रीय अध्यक्ष जेपी नड्डा, केंद्रीय गृहमंत्री अमित शहा, योगी आदित्यनाथ, केंद्रीय रस्ते-वाहतूक मंत्री नितीन गडकरी, राजस्थानच्या माजी मुख्यमंत्री वसुंधरा राजे, मध्य प्रदेशचे मुख्यमंत्री शिवराजसिंह चौहान यांच्यासह भाजपचे अनेक मोठे नेते उपस्थित होते.

The Kashmir Files: ट्वीटमुळे IAS अधिकारी अडचणीत; भाजप सरकारने उचलले ‘हे’ पाऊल

योगींची लोकप्रियता आणि ‘बुलडोजर बाबा’

उत्तर प्रदेशचे पाच वर्ष मुख्यमंत्री राहिलेले आणि काहीच दिवसांत पुन्हा एकदा राज्याच्या मुख्यमंत्रिपदाची शपथ घेण्यासाठी सज्ज असलेले योगी आदित्यनाथ हे कायदा-सुव्यवस्थेच्या प्रश्नावरून घेतलेल्या कडक भूमिकेमुळे आपल्या पहिल्या टर्ममध्ये चर्चेत राहिले. योगी आदित्यनाथ यांच्या मुख्यमंत्रिपदाच्या कार्यकाळात अनेक गुन्हेगारांच्या संपत्तीवर बुलडोजर चालवण्यात आला. त्यामुळे उत्तर प्रदेशसह देशभरात त्यांची ‘बुलडोजर बाबा’ या नावाने लोकप्रियता वाढली. याचाच प्रत्यय उत्तराखंडमध्ये पुष्कर सिंह धामी यांच्या शपधविधी सोहळ्यात आल्याने या सोहळ्याची जोरदार चर्चा होत आहे.

उत्तराखंडमध्ये कोणत्या ८ जणांनी घेतली कॅबिनेट मंत्रिपदाची शपथ?

१. सतपाल महाराज
२. प्रेमचंद्र अग्रवाल
३. गणेश जोशी
४. धनसिंह रावत
५. सुबोध उनियाल
६. रेखा आर्य
७. चंदन राम दास
८. सौरभ बहुगुणा

LEAVE A REPLY

Please enter your comment!
Please enter your name here