Kashmir Files ‘टॅक्स फ्री’ करण्याची मागणी; केजरीवालांच्या भन्नाट उत्तराची देशभर चर्चा – delhi chief minister arvind kejriwal’s reaction on demand for tax free kashmir files movie

नवी दिल्ली: ‘द काश्मीर फाईल्स’ सिनेमावरून (The Kashmir Files Movie) सुरू असलेल्या वादात आता दिल्लीचे मुख्यमंत्री अरविंद केजरीवाल यांनीही उडी घेतली आहे. दिल्लीच्या विधानसभेत बोलताना केजरीवाल यांनी हा सिनेमा ‘टॅक्स फ्री’ करण्याबाबत होत असलेल्या मागणीची खिल्ली उडवली आहे. ‘काश्मीर फाईल्स सिनेमा टॅक्स फ्री करण्याची मागणी भाजपकडून करण्यात येत आहे. मात्र दिग्दर्शक विवेक अग्निहोत्री यांना हा सिनेमा तुम्ही यू-ट्यूबवर टाकायला सांगा, म्हणजे सगळंच फ्री-फ्री होईल आणि एकाच दिवसात सगळे लोकही हा सिनेमा बघतील,’ असं केजरीवाल यांनी म्हटलं आहे. (Arvind Kejriwal On Bjp)

काश्मिरी पंडितांवर झालेल्या अत्याचारावर आधारित ‘द काश्मीर फाईल्स’ हा सिनेमा गेल्या काही दिवसांत चर्चेच्या केंद्रस्थानी आहे. तत्कालीन परिस्थितीवर परखड भाष्य केल्याचं सांगत या सिनेमावर कौतुकाचा वर्षाव होत आहे, तर दुसरीकडे हा सिनेमा फक्त एका धर्माला टार्गेट करण्यासाठी बनवला असून त्यावेळी मुस्लीम समाजावर झालेला अत्याचार यामध्ये दाखवला गेला नाही, असा आक्षेप काही लोकांकडून घेण्यात येत आहे. भाजप नेत्यांकडून मात्र या सिनेमाचं जोरदार समर्थन केलं असून हा सिनेमा टॅक्स फ्री करण्याची मागणी विविध राज्यांमध्ये भाजपने केली आहे. याच मागणीचा समाचार घेताना अरविंद केजरीवाल यांनी तुफान फटकेबाजी केली.

योगी आदित्यनाथ आज घेणार मुख्यमंत्रिपदाची शपथ; राजभवनाकडे पाठवली मंत्र्यांची यादी!

पंतप्रधान मोदींवरही साधला निशाणा

काश्मीर फाईल्स सिनेमावरून होत असलेल्या वादाबद्दल बोलताना अरविंद केजरीवाल यांनी थेट पंतप्रधान नरेंद्र मोदी यांच्यावर निशाणा साधला आहे. आतापर्यंत सत्य दाबण्यात आलं होतं, या सिनेमातून ते सत्य बाहेर येत आहे, असं म्हणत पंतप्रधान मोदींनी या सिनेमाचं समर्थन केलं होतं. यावर बोलताना केजरीवाल म्हणाले की, ‘तुम्ही पंतप्रधान म्हणून गेल्या आठ वर्षांत काहीच काम न केल्यामुळे तुम्हाला एका दिग्दर्शकाच्या पायाशी शरण जावं लागत आहे.’

दरम्यान, अरविंद केजरीवाल यांनी काश्मीर फाईल्सबाबत घेतलेल्या भूमिकेची देशभर चर्चा होत असून या भूमिकेच्या समर्थनार्थ आणि विरोधातही जोरदार प्रतिक्रिया उमटत आहेत.