'कापलेला खासदार निधी राज्याला मिळेल काय?'

मुंबई: केंद्र सरकारने खासदारांच्या पगारात कपात करण्याचा निर्णय घेतला. त्याचे आम्ही स्वागत करतो. मात्र मतदारसंघाच्या विकासासाठी असलेला खासदारांचा पाच कोटींचा निधी केंद्राने का कापला तेच कळत नाही, असं सांगतानाच आमचा कापलेला महाराष्ट्रात येणार आहे का? असा सवाल राष्ट्रवादीच्या नेत्या आणि खासदार यांनी केला आहे.

खासदार सुप्रिया सुळे यांनी राज्यातील जनतेला घरात बसण्याचं आणि लॉकडाऊनचे नियम पाळण्याचं आवाहनही केलं. यावेळी त्यांनी केंद्र सरकारने खासदारांचा विकास निधी कापण्याच्या घेतलेल्या निर्णयावर नाराजीही व्यक्त केली. केंद्र सरकारने खासदारांचा पगार कापण्याचा घेतलेला निर्णय स्वागतार्ह आहे. पण मतदारसंघात खर्च करण्यासाठी देण्यात येणारा ५ कोटींची विकास निधी कापण्याचं कारण समजलं नाही. सरकारच्या या निर्णयाला आमचा विरोध नाही. सरकारला या निधीची गरज असेल तर समजू शकते. पण हा कापलेला निधी महाराष्ट्राला देणार आहात का? महाराष्ट्राच्या निधीचं काय होणार? हे विचारण्याचा अधिकार आम्हाला आहे. उद्या पंतप्रधान खासदारांशी संवाद साधणार आहेत. त्यावेळी ते याचं स्पष्टीकरण देतील, नाही तर आम्ही त्यांना याबाबतचा प्रश्न विचारू, असं सुळे यांनी सांगितलं.

जीएसटीबरोबरच महाराष्ट्राला केंद्राकडून बराच निधी यायचा आहे. महाराष्ट्रासाठी आर्थिक पॅकेजची मागणीही करण्यात आली आहे. महाराष्ट्रासह अनेक राज्यांसमोर आर्थिक अडचणी आहेत. त्यावरही पंतप्रधान बोलतील. शिवाय व्हिजनही सांगतील, अशी अपेक्षा करतानाच राष्ट्रवादीचे अध्यक्ष शरद पवार यांनी महाराष्ट्रात टास्कफोर्स नेमण्याची विनंती मुख्यमंत्री उद्धव ठाकरे यांना केली आहे. मुख्यमंत्री उद्धव ठाकरे सतत सर्वांच्या संपर्कात आहेत. ते बोलतात त्यावेळी सर्वांना आधार मिळतो. सरकारचं काम कसं सुरू आहे, हे ही जनतेला समजतं आहे, असा उपरोधिक टोलाही त्यांनी पंतप्रधानांना लगावला. दरम्यान, ही राजकारणाची वेळ नाही. एकमेकांच्या हाताला धरून महाराष्ट्रासह देश या संकटावर मात कसा करेल याचा विचार करण्याची ही वेळ आहे. त्यामुळे घरीच रहा. घरी राहणं हीच खरी देशसेवा आहे, असे मतही त्यांनी व्यक्त केलं.

मरकजला परवानगी दिलीच कशी?

मरकजच्या घटनेवरूनही त्यांनी सवाल केला आहे. अमेरिकेचे राष्ट्राध्यक्ष डोनाल्ड ट्रम्प दिल्लीत आले, त्यावेळी मोठी दंगल घडली. एवढी मोठी व्हीव्हीआयपी भेट असताना दिल्लीत दंगल होतेच कशी? दिल्लीचे पोलीस आयुक्त काय करत होते? असा सवाल करतानाच दिल्लीच्या दंगलीला दहा दिवस उलटत नाहीत तोच मरकजच्या कार्यक्रमाला दिल्लीच्या पोलीस आयुक्तांनी परवानगी दिलीच कशी? असा सवालही त्यांनी केला. अवघ्या दहा दिवसांच्या अंतरात दिल्लीतील दंगल आणि मरकजची घटना पोलीस आयुक्तांनी होऊच कशी दिली? असा सवालही त्यांनी केला.