निर्धाव ‘षटका’ची गोष्ट: कौन प्रविण तांबे

चर्चेच्या, प्रसिद्धीच्या केंद्रस्थानी राहणाऱ्या व्यक्तीवर चरित्रपट निर्माण करणं जेवढं आव्हानात्मक असतं, तेवढच प्रसिद्धीपासून दूर राहून आपापल्या क्षेत्रात प्रामाणिकपणे कार्यरत राहणाऱ्या व्यक्तिमत्त्वाचा प्रवास मांडणंही. क्रिकेट हेच सर्वस्व असलेल्या, रणजी, आंतरराष्ट्रीय क्रिकेट खेळण्याचं स्वप्न उराशी बाळगून, जीवतोड मेहनत करूनही केवळ नशीबाची साथ नसलेल्या प्रवीण तांबे या एका अवलियाची गोष्ट ‘’ हा सिनेमा आपल्याला सांगतो. वयाच्या ४१ व्या वर्षी आयपीएलमध्ये पदार्पण करणारा हा खेळाडू नक्की कोण आहे, त्याचा भूतकाळ काय आहे, कोणत्या अग्निदिव्यातून तो इथपर्यंत पोहोचला आहे या प्रश्नांची उत्तरं सिनेमा देतो. अर्थात हा संघर्ष मांडताना तो एखाद्या टिपिकल बॉलिवूडपटाप्रमाणे मेलोड्रामा मांडतो, क्रिकेटच्या मैदानाबाहेर घडत असलेल्या संघर्षावर काहीसा कमी फोकस करतो. मात्र, तरीही प्रविण तांबेचं आयुष्य प्रामाणिकपणे दाखवून प्रसिद्धीपासून दूर राहिलेल्या क्रिकेटपटूचा एक चांगला बायोपिक पाहिल्याचं तो समाधान देतो. लेखक किरण यज्ञोपवित, दिग्दर्शक जयप्रद देसाई आणि प्रविणची मध्यवर्ती भूमिका साकारणारा श्रेयस तळपदे यांना त्याचं श्रेय नक्कीच जातं.

चित्रपटाची गोष्ट मुंबईतील. लहानपणापासून क्रिकेट अंगात भिनलेला प्रविण तांबे (श्रेयस तळपदे) चित्रपटाचा नायक आहे. रणजीमध्ये खेळण्याचं स्वप्न बाळगणाऱ्या प्रविणनं गल्ली क्रिकेट, लीग क्रिकेट, विविध स्थानिक स्पर्धा असं सारं काही अक्षरशः गाजवलं आहे. दर वर्षी रणजीच्या सिलेक्शनसाठीही तो जात आहे. मात्र, रणजीचे दरवाजे त्याच्यासाठी बंदच आहेत. सुरुवातीला मीडियम पेसर आणि ऑल राउंडर असणारा प्रविण पुढे लेग स्पीनर म्हणून आपलं नशीब आजमवण्याचा प्रयत्न करतो. क्रिकेट खेळायला मिळावं म्हणून खेळाडू कोट्यावर कंपन्यांमध्ये नोकरी, पोटापाण्यासाठी, संसाराचा गाडा हाकण्यासाठी हिऱ्याच्या कंपनीत काम आणि अगदी त्यापुढेही जाऊन एका नाइट बारमध्ये वेटरचेही काम करण्याची वेळ त्याच्यावर येते. या सर्व संघर्षात आई (छाया कदम), वडील (अरुण नलावडे), पत्नी (अंजली पाटील) हे कुटुंब प्रविणबरोबर आहे. प्रशिक्षक (आशिष विद्यार्थी) त्याला सर्व प्रकारची मदत करत आहेत. तर दुसरीकडे क्रीडा पत्रकार (परमव्रत चटर्जी) आणि काही संघटनात्मक पातळीवरील व्यक्ती मात्र त्याच्या विरोधात आहेत. या सर्व परिस्थितीमध्ये प्रविण क्रिकेटमधील करिअर पुढे कसे नेतो?, आयपीएल स्पर्धेपर्यंत कसा जातो, रणजी खेळण्याचं त्याचं स्वप्न पूर्ण होतं का, अशा प्रश्नांच्या उत्तरासाठी ‘कौन प्रविण तांबे’ हा सिनेमा पाहायला हवा.

या चित्रपटात प्रसिद्धीपासून दूर राहिलेल्या, एका संधीची वाट पाहणाऱ्या क्रिकेटपटूच्या वैयक्तिक आयुष्याची तपशीलवार गोष्ट आपल्याला माहिती नसल्यामुळे पुढं काय घडलं, ही उत्सुकता कायम राहते. प्रवीणचा संघर्ष, परिस्थितीशी दोन हात करताना आलेल्या अनेक अडचणी, स्वप्नपूर्तीसाठी अनेक दशके केलेली बिनतोड मेहनत असं सारं काही परिणामकारक पद्धतीने दाखवलं जातं. मात्र, क्रिकेटच्या सिलेक्शन कमिटीचं राजकारण, विशिष्ट खेळाडूंना मिळणारं झुकतं माप याबद्दल काही ठोस भाष्य आढळत नाही. सिनेमा दोन-तीन दशकांत घडत असल्यामुळं त्या अनुषंगानं पीरिऑडिक सिनेमासाठी करावं लागणारं सारं काही इथे केलं आहे.

लेखक किरण यज्ञोपवित प्रविणच्या आयुष्यातील सर्व चढउतार ताकदीनं मांडतात. दिग्दर्शकाचीही त्याला उत्तम साथ लाभली आहे. श्रेयस तळपदेचा प्रविण पाहताना काही वेळा ‘इक्बाल’ आठवतोच. तरीही त्यानं साकारलेला प्रविण लक्षात राहतो. आशिष विद्यार्थी यांनी रंगविलेला प्रशिक्षक आणि परमव्रत चॅटर्जीचा खडूस पत्रकार उल्लेखनीय. प्रविणच्या पत्नीच्या भूमिकेला अंजली पाटीलनं योग्य न्याय दिलाय. छाया कदम, अरुण नलावडे यांचीही कामे प्रसंगानुरूप. कोण प्रविण तांबे या प्रश्नाच्या उत्तरासाठी सिनेमा पाहायलाच हवा.

निर्माते : शीतल भाटिया, सुदीप तिवारी

लेखन : किरण यज्ञोपवित

दिग्दर्शक : जयप्रद देसाई

छायांकन : सुधीर पळसाने

संकलन : गोरक्षनाथ खांडे

कलाकार : श्रेयस तळपदे, आशिष विद्यार्थी, परमव्रत चटर्जी, अंजली पाटील, छाया कदम, अरुण नलावडे

ओटीटी : डिझ्ने हॉटस्टार

दर्जा : साडेतीन स्टार