Omicron New Variant Big Relief For India Covid-19-Cases-Drop-Below-1000-After-715-Days | जगभरात करोनाचं थैमान सुरू; मात्र २ वर्षांनंतर भारताला सर्वात मोठा दिलासा!

नवी दिल्ली : करोनाच्या ओमिक्रॉन व्हेरिएंटचा सब व्हेरिएंट BA.2 च्या (Coronavirus New Variant Omicron) प्रादुर्भावामुळे जगभरातील अनेक देश हैराण झाले आहेत. ओमिक्रॉनचा संसर्ग वेगाने वाढत असल्याने चीनसह युरोपातील अनेक देशांमध्ये लॉकडाऊन करण्याची नामुष्की ओढावली आहे. मात्र भारतात करोनाचा प्रादुर्भाव झपाट्याने कमी होत असून देशात ७१५ दिवसांनंतर नव्या रुग्णांची संख्या एक हजाराहून कमी नोंदवली गेली आहे. (Corona Cases In India In 24 Hours)

भारतात मागील २४ तासांत अवघे ९१३ करोना रुग्ण आढळले आहेत. मागील ७१५ दिवसांतील ही सर्वात कमी संख्या आहे. करोनाचा प्रादुर्भाव कमी झाल्याने देशातील निर्बंध उठवण्यात आले असून आजपासून अनेक राज्यांतील शाळाही सुरू करण्यात आल्या आहेत.

Pravin Darekar: ‘मी रोजगार हमी योजनेवर पण काम केलंय, ठाकरे सरकार ‘पराचा कावळा’ करतंय’

देशात काय आहे करोना प्रादुर्भावाची स्थिती?

करोना प्रादुर्भाव आटोक्यात आल्याने भारतातील करोनाच्या सक्रिय रुग्णांची संख्या १२ हजार ५९७ इतकी कमी झाली आहे. करोनामुळे मागील २४ तासांत १३ जणांनी आपला जीव गमावला आहे.

लसीकरणात देशाने घेतली आघाडी

देशव्यापी कोविड-१९ प्रतिबंधक लसीकरणाला १६ जानेवारी २०२१ पासून सुरुवात झाली आणि त्यानंतर या लसीकरण मोहिमेचा वेग आणि व्याप्ती वाढवण्यात आल्याने लस घेतलेल्या नागरिकांची संख्या मोठ्या प्रमाणात वाढली. ३ एप्रिल २०२२ च्या अहवालातील आकडेवारीनुसार, भारताच्या कोविड प्रतिबंधक लसीकरण मोहिमेत देण्यात आलेल्या लसीच्या मात्रांच्या संख्येने १८४ कोटी ६६ लाखांचा टप्पा ओलांडला आहे. देशातील १२ ते १४ वर्ष वयोगटातील मुलामुलींसाठी १६ मार्च २०२२ रोजी कोविड प्रतिबंधक लसीकरण मोहीम सुरू झाली. आतापर्यंत १.८५ कोटीहून अधिक किशोरवयीन बालकांना लसीची पहिली मात्रा देण्यात आली आहे.