त्यांची ही अवस्था जेव्हा त्यांचे जवळचे मित्र अभिनेते धर्मेंद्र यांना कळली तेव्हा त्यांनी तडक सायरा बानू यांची भेट घेतली. अभिनेत्री मुमताज आणि अभिनेते शत्रुघ्न सिन्हा यांनीही सायरा बानू यांची चौकशी केली. मात्र सायरा बानू यांना एकटेपणाने इतकं घेरलं आहे की त्यांना समजावणंही मुश्कील झाल्याचं मुमताज यांनी सांगितलं.
दिलीप कुमार यांचं वयाच्या 98 व्या वर्षी जून 2021 मध्ये निधन झालं. दिलीप कुमार यांच्या शेवटच्या श्वासापर्यंत सायरा बानू या त्यांच्यासोबत होत्या. दिलीप कुमार यांच्या तब्येतीच्या सर्व अपडेटही त्याच देत होत्या. पण गेल्या 9 महिन्यात दिलीप कुमार यांच्या नसण्याचे दु:ख त्या पचवू शकलेल्या नाहीत. 1966 ला या दोघांनी लग्न केलं तेव्हा दिलीप कुमार 44 वर्षांचे होते तर सायरा यांचं वय अवघं 22 वर्ष होतं.
खरं तर सायरा यांना अभिनेता राजेंद्र कुमार आवडत होता. पण त्यांचं लग्न झालं होतें. ही गोष्ट जेव्हा सायरा यांच्या आईला कळली, तेव्हा त्यांनी सायराला समजावण्याची जबाबदारी दिलीप कुमार यांना दिली. त्यावेळी सायराने दिलीप कुमार यांना मग, तुम्ही माझ्याशी लग्न कराल का, असं विचारलं आणि दिलीप कुमार यांनीही होकार दिला. एकमेकांवरील प्रेमामुळे त्यांच्या आयुष्यात वयाच्या अंतराचा अडसर कधीच आला नाही, असं ही जोडी नेहमी सांगायची.
दिलीप कुमार यांच्या निधनानंतर सायरो बानू यांनी लोकांना भेटणं बंद केल्याने त्यांच्या मित्रपरिवारात चिंतेचे वातावरण आहे. सायरा यांची तब्येत सध्या बरी नाही. त्यांनी मला कोणालाही भेटायला देऊ नका, अशा सूचना घरातील मदतनीसांना दिल्या आहेत. जेव्हा सायरा बानू यांच्या या अवस्थेविषयी दिलीप कुमार आणि सायरा यांचे जवळचे मित्र अभिनेते धर्मेंद यांना कळलं, तेव्हा ते तडक भेटायला गेले. तेव्हाही सायरा यांनी नकार दिला.
दिलीप कुमार आणि सायरा यांच्यासोबत अनेक सिनेमात काम केलेल्या अभिनेत्री मुमताज यांनाही सायरा यांची अवस्था ऐकून राहवलं नाही. पण मुमताज यांच्यासोबतही सायरा यांची भेट झाली नाही. याआधी जेव्हा जेव्हा मुमताज सायरा यांना भेटायला घरी जायच्या तेव्हा त्या स्वत: बनवलेल्या कुकीज खायला घातल्याशिवाय त्यांना सोडायच्या नाहीत. या आठवणीने मुमताज भावुक झाल्या. तर अभिनेते शत्रुघ्न सिन्हा यांनीही सायरा यांची भेट घेण्याचा प्रयत्न केला पण त्यांच्याही पदरी निराशाच आली. सायरा यांनी लवकरात लवकर या दु:खातून बाहेर यावं अशी प्रार्थना चित्रपट सृष्टीतले प्रत्येक जण करत आहेत.
