मुंबई : लेखक-दिग्दर्शक दिग्पाल लांजेकर यांनी ‘शिवराज अष्टक’ या संकल्पनेअंतर्गत ‘फर्जंद’, ‘फत्तेशिकस्त’ आणि ‘पावनखिंड’ या चित्रपटांचं यशस्वी दिग्दर्शन केलं आहे. या संकल्पनेअंतर्गंत प्रदर्शित झालेल्या सर्व चित्रपटांना प्रेक्षकांनी भरभरून प्रतिसाद दिला आहे. आता या संकल्पनेतील पुढचा चित्रपट ‘शेर शिवराज’ येत्या २२ एप्रिल रोजी सिनेमागृहांत प्रदर्शित होणार आहे. गेल्या काही दिवसांपासून मनोरंजन विश्वामध्ये या चित्रपटाची जोरदार चर्चा आहे. चित्रपटाच्या प्रमोशची सुरुवात थेट प्रतापगडावरून दणक्यात करण्यात आली होती. ‘शेर शिवराज’ चित्रपटाचं वैशिष्ट्य म्हणजे बॉलिवूडमधील आघाडीचा अभिनेता यात दिसणार आहे. हा अभिनेता शेर शिवराजमध्ये अफझल खानाची भूमिका साकारणार आहे.


शेर शिवराज या चित्रपट हा अफझल खान वधावर आधारित आहे. या चित्रपटामध्ये शिवरायांची भूमिका चिन्मय मांडलेकर साकारत आहे. परंतु सर्वांना उत्सुकता होती ती अफझल खानाची भूमिका कोण साकारणार याची. विजापूरच्या दरबारात ‘मै लाऊंगा शिवाजी को…! जिंदा या मुर्दा!’, अशी वल्गना करत अफझल खानाने शिवरायांना जिवंत वा मृत घेऊन येण्याचा विडा उचलला होता. इतिहासाच्या पानांत अफझलच्या क्रूरतेबद्दलही भरभरून लिहिण्यात आलं आहे. त्यामुळे या चित्रपटातील जो अभिनेता अफझल खान साकारणार तो त्या तोडीचा असणं अत्यंत गरजेचं होतं. या चित्रपटात ही भूमिका कोण साकारणार याबाबत चित्रपटाच्या टीमनं कमालीची गुप्तता पाळली होती. परंतु ‘मटा ऑनलाईन’ला मिळालेल्या खात्रीशीर वृत्तानुसार शेर शिवराज सिनेमात अफजल खानाची भूमिका बॉलिवूडमधील आघाडीचे अभिनेता मुकेश ऋषी साकारणार आहेत!

मुकेश ऋषी अफझल खानाच्या भूमिकेत

साताऱ्यात शिरताच चिन्मय मांडलेकरचं जंगी स्वागत


मुकेश ऋषी यांचं एकूण व्यक्तिमत्त्व पाहता ते अफझल खानाच्या भूमिकेसाठी अत्यंत योग्य आहेत. भरभक्कम देहयष्टी, करारी चेहरा,नजर समोरच्याच्या हृदयाचा ठाव घेणारी आणि आवाजात जरब असं त्यांचं एकूणच व्यक्तिमत्त्व आहे. इतिहासामध्ये अफजल खानाचं जे वर्णन करण्यात आलं आहे, त्यासाठी मुकेश ऋषी या भूमिकेसाठी चपखल आहेत. मुकेश ऋषी यांनी हिंदीबरोबरच तेलुगु, कन्नडा, मल्याळम, पंजाबी, भोजपुरी,तमिळ भाषांतील सिनेमात काम केलं आहे. तसंच मुकेश यांनी याआधी ‘ट्रकभर स्वप्नं’ या मराठी सिनेमातही काम केलं आहे.

मुकेश ऋषी

प्रतापगडावर डौलानं फडकणारा हिंदवी स्वराज्याचा भगवा झेंडा, महाराजांचा रक्तानं माखलेला हात, खानाचा कोथळा काढणारी वाघनखं आणि त्या काळापासून आजच्या युगापर्यंत घडणाऱ्या सर्व घटनांचा मूक साक्षीदार असणाऱ्या तळपत्या सूर्याचं दर्शन पोस्टरवर घडतं आणि चित्रपटाच्या टीझरमधूनही तो थरार पाहायला मिळतो.

Video : ‘शेर शिवराज’ सिनेमाच्या कलाकारांनी भवानी आईला घातलं साकडं


‘शेर शिवराज’ सिनेमात शिवरायांची भूमिका चिन्मय मांडलेकर, जिजाऊंची भूमिका मृणाल कुलकर्णी, तानाजी मालुसरेची भूमिका अजय पूरकर, कान्होजी जेधे ही भूमिका समीर धर्माधिकारी तर दिग्पाल लांजेकर बहिर्जी नाईक साकारत आहे. ‘शेर शिवराज’ सिनेमातून अफजलखानाच्या वधाची कथा दाखवण्यात आली आहे. ही कथा आता मोठ्या पडद्यावर पाहण्याची प्रेक्षकांना उत्सुकता लागली आहे.

मुकेश ऋषी

LEAVE A REPLY

Please enter your comment!
Please enter your name here