म. टा. प्रतिनिधी, मुंबईः एसटी संपामध्ये सहभागी जवळपास निम्मे कर्मचारी कामावर हजर झाले असून, कुठल्याही कागदपत्रांच्या पूर्ततेमध्ये न अडकवता त्यांना तातडीने रुजू करून घेण्याच्या हालचालींना वेग आला आहे. राज्यात सर्व आगारांत मिळून १६ हजारांहून अधिक फेऱ्या मार्गस्थ करण्यात आल्याची माहिती महाराष्ट्र राज्य मार्ग परिवहन अर्थात एसटी महामंडळाने गुरुवारी दिली. सहा महिन्यांनंतर एसटी पूर्वपदावर येण्यास सज्ज झाली आहे.

‘एसटी संपकरी कर्मचाऱ्यांनी कामावर हजर व्हावे,’ या उच्च न्यायालयाच्या लेखी आदेशाला गुरुवारी आठवडा पूर्ण झाला. संपामध्ये चालक आणि वाहक मोठ्या संख्येने सहभागी झाल्याने एसटी फेऱ्यांवर त्याचा परिणाम झाला होता. बुधवारअखेर ९,४१३ चालक आणि ९,२११ वाहक कामावर हजर झाले. कार्यशाळा आणि प्रशासकीय मिळून एकूण २१,५९५ कर्मचारी कामावर हजर झाले आहेत. संपकाळात राज्यातील २५० आगार सुरू होते; मात्र त्या ठिकाणांहून एसटी फेऱ्या धावत नव्हत्या. आता कर्मचारी पुन्हा कामावर आल्याने राज्यातील एसटी वाहतूकदेखील सुरू झाली असून, बुधवारअखेर राज्यात विविध मार्गांवर १६ हजार फेऱ्या मार्गस्थ करण्यात आल्या. या फेऱ्यांच्या माध्यमातून रोज सुमारे १३ कोटी रुपयांचे उत्पन्न महामंडळाला मिळत आहे, अशी माहिती एसटी महामंडळाकडून देण्यात आली. महामंडळाच्या हजेरीपटावर सध्या एकूण ८१,६८३ कर्मचारी आहेत. गुरुवारअखेर एकूण ४१,४६२ कर्मचारी कामावर रुजू झाले आहेत. १२ आणि १३ एप्रिलला २,९७१ कर्मचारी कामावर परतले.

महामंडळाने बडतर्फ केलेल्या अकरा हजारांहून अधिक कर्मचाऱ्यांना कामावर रुजू होण्याची संधी देण्यात आली आहे. ज्या कर्मचाऱ्यांवर फौजदारी स्वरूपाचा गुन्हा नोंदवण्यात आलेला आहे, अशा कर्मचाऱ्यांची माहिती घेऊन त्याबाबत परिवहनमंत्री आणि एसटी महामंडळाचे अध्यक्ष अनिल परब यांनी दिलेल्या आदेशानुसार योग्य ती कारवाई करण्यात येईल.

२८ ऑक्टोबर २०२१पासून राज्यातील जवळपास ९२ हजार एसटी कर्मचाऱ्यांनी संप पुकारला. संपामुळे राज्यातील एसटी सेवा ठप्प झाली. संपकाळात समाजातील सर्वच प्रवासीवर्ग खासगी वाहनांच्या जात्यात भरडून निघाला. त्यातच करोनानिर्बंध हटल्याने शाळा सुरू झाल्या. विद्यार्थ्यांचे अतोनात हाल झाले. अखेर मुंबई उच्च न्यायालयाने या प्रकरणी सुनावणी घेऊन संपकऱ्यांना कामावर हजर राहण्याच्या सूचना केल्यानंतर संपकरी कर्मचाऱ्यांची पावले पुन्हा एकदा महामंडळाकडे वळाली आहेत.

अनेक कर्मचाऱ्यांनी साधला संपर्क

‘अनेक कर्मचाऱ्यांनी कामावर परतण्याबाबत स्थानिक विभागीय स्तरावर संपर्क साधला आहे. त्यांना पुन्हा कामावर घेण्याची प्रकिया सुरू करण्यात आलेली आहे,’ अशी माहिती एसटी महामंडळातील जनसंपर्क अधिकारी राजन शेलार यांनी दिली.

– एकूण कर्मचारी ८१,६८३; गुरुवारअखेर ४१,४६२ रुजू

– राज्यात १६ हजार फेऱ्या सुरू; रोज १३ कोटी रुपयांचे उत्पन्न

LEAVE A REPLY

Please enter your comment!
Please enter your name here