राजकारणातील एण्ट्रीनंतर हरभजन सिंहचा कौतुकास्पद निर्णय; खासदारकीचं संपूर्ण वेतन… – harbhajan singhs big decision about rajya sabha salary after his entry into politics

चंदीगढ : भारताचा माजी क्रिकेटपटू आणि अरविंद केजरीवाल यांच्या आम आदमी पक्षाकडून (AAP) राज्यसभेवर निवडून गेलेल्या हरभजन सिंह (Harbhajan Singh Aap) याने एक कौतुकास्पद निर्णय घेतला आहे. खासदार म्हणून मला मिळणारे संपूर्ण वेतन मी शेतकऱ्यांच्या मुलींच्या शिक्षणासाठी देऊ इच्छितो, अशी घोषणा हरभजन सिंह याने केली आहे. या घोषणेनंतर हरभजन याच्यावर देशभरातून कौतुकाचा वर्षाव होत आहे.

आपल्या जादुई फिरकीच्या जोरावर अनेक दिग्गज फलंदाजांना सळो की पळो करून सोडणाऱ्या हरभजन सिंह याने काही दिवसांपूर्वी राजकारणात प्रवेश केला. त्यानंतर ‘आप’ने पंजाबमधून हरभजन सिंह याची राज्यसभा सदस्यत्वासाठी उमेदवारी जाहीर केल्यानंतर विरोधात कोणत्याही पक्षाने उमेदवार न दिल्याने त्याची राज्यसभेवर बिनविरोध निवड झाली. पंजाब आणि देशातील लोकांच्या हितासाठी मी काम करेन, असं हरभजन सिंहने यावेळी म्हटलं होतं. त्यानंतर आता हरभजनने खासदार म्हणून मिळणाऱ्या वेतनाबाबत महत्वपूर्ण निर्णय घेतला आहे.

रोहित शर्माच ठरतोय मुंबई इंडियन्ससाठी डोकेदुखी; पुन्हा एकदा केली मोठी चुक, संघाला बसला फटका

नक्की काय म्हणाला हरभजन सिंह?

हरभजन सिंहने एक ट्वीट केलं असून त्यामध्ये म्हटलं आहे की, ‘एक राज्यसभा सदस्य म्हणून मी माझे वेतन शेतकऱ्यांच्या मुलींच्या शिक्षणासाठी आणि प्रगतीसाठी देऊ इच्छितो. देशाच्या प्रगतीसाठी मी राजकारणात प्रवेश केला आहे आणि देशासाठी जे करणं शक्य आहे ते मी करत राहीन.’

हरभजन सिंह आणि आम आदमी पक्ष

हरभजन सिंहने २४ डिसेंबर २०२१ रोजी क्रिकेटमधून निवृत्तीची घोषणा केली होती. त्यानंतर हरभजन सिंह काँग्रेसमधून आपल्या राजकीय इनिंगला सुरुवात करू शकतो, असा अंदाज व्यक्त केला जात होता. कारण त्याने पंजाब काँग्रेसचे माजी प्रदेशाध्यक्ष नवज्योतसिंह सिद्धू यांची भेट घेतली होती. मात्र नंतरच्या काळात हरभजनची आम आदमी पक्षाच्या नेत्यांसोबत जवळीक वाढली आणि त्याने ‘आप’सोबत जाण्याचा निर्णय घेतला.