मशिदीवरील भोंगे हटवण्यासाठी (Loud Speaker Ban) मनसे आणि भाजपने आक्रमक भूमिका घेतल्याने गृहमंत्रालयाने याबाबत गंभीर दखल घेतल्याची माहितीही गृहमंत्री दिलीप वळसे पाटील यांनी दिली. मशिदीवरील भोंग्यांबाबत निर्णय घेण्यासाठी राज्यातील सर्व विरोधी पक्षांच्या प्रमुख नेत्यांची बैठक बोलावण्यात येणार आहे. राज ठाकरे यांनाही या बैठकीसाठी बोलावण्यात येईल. सर्व नेत्यांसोबत चर्चा करूनच अंतिम निर्णय घेतला जाईल, असं वळसे पाटील म्हणाले.
‘मी संपकऱ्यांकडून पैसे घेतल्याचं मान्य करतो’; कोर्टात सदावर्तेंची अखेर कबुली
‘…तर कठोर कारवाई करणार’
गेल्या काही दिवसांपासून ठराविक घटकांकडून राज्यात तणाव निर्माण करण्याचा प्रयत्न केला जात आहे. गृहविभाग या घडामोडींकडे अत्यंत गांभीर्याने पाहात आहे. कोणीही कायदा हातात घेण्याचा प्रयत्न करू नका किंवा दोन समाजात तेढ निर्माण करू नका, अशी माझी सर्वांना विनंती आहे. मात्र तरीही कोणी तसा प्रयत्न केला तर संबंधितांवर कठोर कारवाई केली जाईल, असा इशारा गृहमंत्र्यांनी दिला आहे.
मशिदीत सीसीटीव्ही बसवण्याचा मागणीवर काय म्हणाले गृहमंत्री?
राज्यातील बहुतांश मंदिरांमध्ये सीसीटीव्ही कॅमेरे आहेत, मग मशिदीत असे कॅमेरे का नाहीत, असा सवाल करत मनसे नेते बाळा नांदगावकर यांनी राज्य सरकारकडे सर्व धार्मिक स्थळांमध्ये सीसीटीव्ही कॅमेरे बसवण्याची मागणी केली आहे. या मागणीवर बोलताना वळसे पाटील म्हणाले की, ‘मंदिरांमध्ये सीसीटीव्ही कॅमेरे लावण्यासाठी कोणत्याही सूचना नाहीत. मात्र कोणी स्वेच्छेने सुरक्षेच्या कारणास्तव मंदिरात कॅमेरे लावले असतील आणि इतरही प्रार्थनास्थळांवर कोणाला स्वेच्छेने सीसीटीव्ही कॅमेरे लावायचे असतील तर त्याला राज्य सरकारचा विरोध असण्याचं काही कारण नाही,’ असं स्पष्टीकरण वळसे पाटलांनी दिलं आहे.
