‘भारतात मुस्लिमांवरील हिंसाचाराचा उत्सव पाहून वाईट वाटले’
पद्मा लक्ष्मीने आपल्या ट्वीटमध्ये लिहिले की, ‘भारतात मुस्लिमांविरुद्ध हिंसाचार कसा साजरा केला जातो हे पाहून वाईट वाटतं. मुस्लिमविरोधी वक्तृत्वामुळे लोकांमध्ये भीती निर्माण होते आणि त्यांच्या मनात विष भरवले जाते. हा प्रचार धोकादायक आणि निंदनीय आहे कारण जेव्हा तुम्ही एखाद्याला कमी लेखता तेव्हा त्यांच्या छळात सहभागी होणे खूप सोपे होते.’
पद्मा लक्ष्मी- संपूर्ण जगात हिंदुत्वाला कुठेही धोका नाही
आणखी एका ट्वीटमध्ये तिने लिहिले की, ‘प्रिय हिंदूंनो, मनात भीती बाळगू नका. भारतात किंवा इतर कुठेही हिंदू धर्माला धोका नाही. खऱ्या अध्यात्मात कोणत्याही प्रकारचा द्वेष पेरण्याची जागा नसते. या प्राचीन, विस्तीर्ण भूमीत सर्व धर्माच्या लोकांना शांततेनं राहता आलं पाहिजे.’
जहांगीरपुरी आणि खरगोनमध्ये काय घडलं?
हनुमान जयंतीच्या निमित्ताने एप्रिलच्या सुरुवातीला दोन समुदायांमध्ये हिंसाचार आणि संघर्ष झाला होता. या काळात जाळपोळ आणि दगडफेकीच्या अनेक घटना घडल्या. अनेक वाहनं मोर्चाच्या हाती लागली. यामध्ये ८ पोलिसांसह एक स्थानिक रहिवासी जखमी झाला. जहांगीरपुरी हिंसाचारप्रकरणी आतापर्यंत २८ जणांना अटक करण्यात आली आहे. त्याचवेळी मध्य प्रदेशातील खरगोनमध्येही रामनवमीच्या मिरवणुकीत मोठा गोंधळ झाला होता.
कोण आहे पद्मा लक्ष्मी
पद्मा लक्ष्मी एक भारतीय मूळची अमेरिकन लेखिका आणि टीव्ही रिअॅलिटी होस्ट आहे. तिचं पूर्ण नाव पद्मा पार्वती लक्ष्मी आहे. तिचा जन्म चेन्नईतील एका ब्राह्मण कुटुंबात झाला. पद्मा लक्ष्मी दोन वर्षांची असताना पालकांचा घटस्फोट झाला. वयाच्या चौथ्या वर्षी पद्मा लक्ष्मी अमेरिकेत गेली आणि तिथेच तिचं पालन पोषण झालं. पद्मा लक्ष्मीने वयाच्या २१ व्या वर्षी मॉडेलिंग करिअरला सुरुवात केली. तिने अनेक आंतरराष्ट्रीय डिझायनर्ससाठी रॅम्प वॉक केले. सध्या टॉप शेफ या टीव्ही शोची ती जज आहे.
पद्मा लक्ष्मीचं खासगी आयुष्य
२००४ मध्ये पद्मा लक्ष्मीने लेखक सलमान रश्दी यांच्याशी लग्न केलं. पण तीन वर्षांनी त्यांचा घटस्फोट झाला. ती Theodore J. Forstmann याच्यासोबत रिलेशनशिपमध्ये होती. पण २०११ मध्ये त्यांचा मृत्यू झाला.
