नवी दिल्ली : करोना दरम्यानन शनिवारी यांनी वेगवेगळ्या राज्यांतील मुख्यमंत्र्यांसोबत व्हिडिओ कॉन्फरन्सिंगद्वारे संवाद साधला. यावेळी पंतप्रधान नरेंद्र मोदी आपल्या घरीच मास्क परिधान करून बसलेले पाहायला मिळाले. आपल्या उपरण्याचाच वापर पंतप्रधानांनी मास्क म्हणून केला होता आणि ते मुख्यमंत्र्यांशी चर्चा करत होते.

यावेळी पंतप्रधानांनी या परिस्थितीशी दोन हात करण्यासाठी राज्यांकडून सूचनाही मागवल्या. मी तुमच्यासाठी २४ X ७ उपलब्ध असल्याचं यावेळी पंतप्रधान नरेंद्र मोदी यांनी मुख्यमंत्र्यांना सांगितलं. या बैठकीत आरोग्य मंत्रालयानं करोना व्हायरसच्या फैलावाचा तपशीलासहीत एक प्रेझेन्टेशनही दिलं.

लॉकडाऊन वाढवण्याची मुख्यमंत्र्यांची मागणी

या बैठकीत महाराष्ट्राचे मुख्यमंत्री उद्धव ठाकरे यांनी लॉकडाऊन वाढवण्याची मागणी केलीय. महाराष्ट्रात देशातील सर्वाधित १३६४ करोनाबाधित रुग्ण आढळले आहेत. यातील ९७ जणांचा मृत्यू झालाय. दरम्यान, दिल्लीचे मुख्यमंत्री अरविंद केजरीवाल यांनीही ‘परिस्थिती अद्यापही नियंत्रणात आलेली नसल्यानं लॉकडाऊनचा कालावधी कमीत कमी ३० एप्रिलपर्यंत वाढवण्यात यावा’, अशी मागणी केलीय. दिल्लीतही ९०३ करोनाबाधित रुग्ण आढळले आहेत. शुक्रवारी एकाच दिवशी १८३ रुग्ण सापडले. त्यामुळे, दिल्लीतील अनेक भागांना ‘संक्रमित झोन’ म्हणून घोषित करण्यात आलंय.

लॉकडाऊनचा १८वा दिवस

करोना फैलाव रोखण्यासाठी पंतप्रधान नरेंद्र मोदी यांनी २४ मार्च रोजी देशव्यापी लॉकडाऊनची घोषणा केली होती. २१ दिवसांच्या लॉकडाऊनचा आज १८ वा दिवस आहे. उल्लेखनीय म्हणजे, देशात लॉकडाऊन घोषित करण्यात आल्यानंतरही करोनाबाधितांची संख्या मोठ्या प्रमाणात वाढल्याचं दिसून आलंय. दरम्यान, देशातील करोनाबाधितांची संख्या ७४४७ वर पोहचली आहे. यामध्ये ७१ परदेशी नागरिकांचा समावेश आहे. तर आत्तापर्यंत देशातील २३९ जणांना करोनामुळे प्राण गमवावे लागले आहेत. दरम्यान, दिलासादायक बाब म्हणजे ६४३ जणांनी करोनावर यशस्वीरित्या मात केलीय. त्यांना रुग्णालयातून डिस्चार्ज देण्यात आलाय.

Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times

LEAVE A REPLY

Please enter your comment!
Please enter your name here