वृत्तसंस्था, ललितपूर (उत्तर प्रदेश)

सामूहिक बलात्काराची तक्रार नोंदविण्यासाठी गेलेल्या एका १३ वर्षीय मुलीवर उत्तर प्रदेशच्या पाली पोलिस ठाण्यातील पोलिस अधिकाऱ्यानेच बलात्कार केल्याची घटना उघडकीस आल्यानंतर सर्वत्र संतापाची लाट पसरली. तिलकधारी सरोज असे या पोलिस अधिकाऱ्याचे नाव असून या प्रकारानंतर त्याला निलंबित करण्यात आले आहे. घटनेनंतर पसार झालेल्या या पोलिस अधिकाऱ्यास बुधवारी प्रयागराज येथे अटक करण्यात आली. हा प्रकार २७ एप्रिल रोजी घडला. या प्रकरणी एकूण पाच जणांना अटक करण्यात आली आहे, अशी माहिती पोलिसांनी दिली. (Rape Case News)

२२ एप्रिलला चार जणांनी माझ्या मुलीचे अपहरण केले व ते तिला भोपाळ येथे घेऊन गेले. त्यांनी तेथे तिच्यावर सतत तीन दिवस बलात्कार केला. माझ्या मुलीस त्या चौघांनीच पाली पोलिस ठाण्याच्या बाहेर सोडले व ते तेथून पळून गेले, असे या मुलीच्या आईने म्हटले आहे. मात्र या पोलिस ठाण्यात ती तक्रार नोंदविण्यासाठी गेली असता तेथील पोलिस अधिकाऱ्याने तिला आपल्या कक्षात बोलावले व तिच्यावर बलात्कार केला, असा आरोप या मुलीच्या आईने केला. यानंतर या मुलीने चाइल्डलाइन या स्वयंसेवी संस्थेच्या सदस्यांच्या कानावर हा प्रकार घातला. या संस्थेने या प्रकरणी तक्रार दाखल केल्यानंतर पोलिसांनी बलात्कार, अपहरण, गुन्हेगारी कट या आरोपांसह पोक्सो कायद्याच्या संबंधित कलमांतर्गत गुन्हे दाखल केले.

मनसेचा दबका आवाज; कार्यकर्त्यांची धरपकड, नोटिसा, तडीपारीने आंदोलन क्षीण

शीघ्रगती न्यायालयात जाणार

या प्रकरणातील दोषींवर राष्ट्रीय सुरक्षा कायद्यांतर्गत कारवाई होईल. तसेच, हा खटला शीघ्रगती न्यायालयात चालविण्यात येईल, असे उत्तर प्रदेशचे उपमुख्यमंत्री ब्रिजेश पाठक यांनी सांगितले. गुन्हेगारी घटनांवरून विरोधकांनी राजकारण करू नये, असेही ते म्हणाले.

मानवाधिकार आयोगाची नोटीस

राष्ट्रीय मानवाधिकार आयोगाने या प्रकाराची गंभीर दखल घेतली असून या प्रकरणी आयोगाने उत्तर प्रदेशचे मुख्य सचिव तसेच, पोलिस महासंचालकांना बुधवारी नोटीस बजावली. याविषयी येत्या चार आठवड्यांत अहवाल सादर करण्याचे निर्देश आयोगाने त्यांना दिले. समाजवादी पक्ष व काँग्रेसने या घटनेवरून उत्तर प्रदेश सरकारवर सडकून टीका केली आहे.

LEAVE A REPLY

Please enter your comment!
Please enter your name here