केवाडिया (गुजरात) :भारतात करोनामुळे ४७ लाख मृत्यू झाल्याचे जागतिक आरोग्य संघटनेने (डब्ल्यूएचओ) नुकतेच जाहीर केले. यावर केंद्र सरकारने टीका केल्यानंतर विविध राज्यांच्या आरोग्यमंत्र्यांनीही ही आकडेवारी फेटाळली आहे. केंद्रीय आरोग्य आणि कुटुंबकल्याण परिषदेच्या (सीसीएचएफडब्ल्यू) १४व्या परिषदेत डब्ल्यूएचओच्या आकडेवारीवर त्यांनी आक्षेप घेतला. ही आकडेवारी निराधार असून देशाची प्रतिमा मलीन करण्याचा उद्देश यामागे आहे, असा आरोप या मंत्र्यांनी केला.
आनंद दिघे आणि माझ्यात दोन साम्य, सलमानच्या वक्तव्यानंतर मुख्यमंत्र्यांनी तिसरं सांगितलं, म्हणाले…
मृत्यूची नोंदणी करण्यासाठी देशाची सक्षम, प्रभावी आणि सर्वसमावेशक यंत्रणा आहे आणि कायदेशीर प्रक्रियेचे पालन करून सर्व करोनामृत्यूंची पद्धतशीर पारदर्शकतेने नोंद करण्यात आली आहे, असेही आरोग्यमंत्र्यांनी नमूद केले. डब्ल्यूएचओच्या मृत्यूबाबतच्या अनुमानावर तीव्र आक्षेप नोंदवणारा ठराव या परिषदेत मंजूर करण्यात आला. डब्ल्यूएचओची आकडेवारी अस्वीकारार्ह आहे. या जागतिक संघटनेने ही आकडेवारी काढण्यासाठी वापरलेली पद्धत सदोष आहे, असे या ठरावात म्हटले आहे. गुजरातच्या केवाडिया येथे झालेल्या या परिषदेचे गुरुवारी उद्घाटन करण्यात आले होते. केंद्रीय आरोग्यमंत्री मनसुख मांडविया यांच्या अध्यक्षतेखाली ही परिषद पार पडली.

डब्ल्यूएचओने वापरलेल्या पद्धतीवर कर्नाटकचे आरोग्यमंत्री के. सुधाकर यांनी प्रश्नचिन्ह उपस्थित केले. भारताची प्रतिष्ठा मलीन करण्याचा हा प्रयत्न आहे, असा आरोप त्यांनी केला. ‘डब्ल्यूएचओने तर्कशुद्ध पद्धत वापरली नाही. त्यांच्या अहवालाचा सर्व आरोग्यमंत्र्यांनी परिषदेत निषेध केला आणि याविरोधात ठराव मंजूर केला. भारताची नाराजी डब्ल्यूएचओपर्यंत पोहोचवण्याची आणि ती उच्चस्तरीय आंतरराष्ट्रीय व्यासपीठावर मांडण्याची विनंती आम्ही मांडविया यांना केली आहे, असेही सुधाकर यांनी सांगितले.

श्रीलंकेत आणीबाणीच्या निर्णयास विरोध, महिंदा राजपक्षेंवर राजीनाम्यासाठी दबाव वाढला
पाकिस्तानचाही आक्षेप
पाकिस्ताननेही करोना मृत्यूबाबतचा डब्ल्यूएचओचा अहवाल फेटाळून लावला. त्यांनी संघटनेच्या माहिती जमा करण्याच्या पद्धतीवर प्रश्नचिन्हही उपस्थित केले. तसेच आकडेवारी जमा करण्यासाठी वापरण्यात आलेल्या सॉफ्टवेअरमध्ये त्रुटी असल्याची शक्यता वर्तवली. डब्ल्यूएचओने नुकत्याच जाहीर केलेल्या अहवालात पाकिस्तानमध्ये दोन लाख ६० हजार करोनामृत्यू झाल्याचा दावा करण्यात आला आहे. ही संख्या अधिकृत आकडेवारीच्या आठपट आहे. पाकिस्तानात ३० हजार ३६९ करोनामृत्यूची नोंद झाली आहे. आम्ही करानामृत्यूबद्दल माहिती जमा करत आहोत. त्यात काही फरक असू शकतो, परंतु तो हजारांमध्ये असू शकत नाही. हे पूर्णपणे निराधार आहे, असे आरोग्यमंत्री अब्दुल कादिर पटेल यांनी प्रसारमाध्यमांना सांगितले.
शनिवारी ३,८०५ नवे रुग्ण

देशात शनिवारी तीन हजार ८०५ नव्या करोनारुग्णांची नोंद झाली. यामुळे उपचाराधीन रुग्णांची संख्या २० हजार ३०३वर गेली आहे. एकूण रुग्णसंख्या चार कोटी ३० लाख ९८ हजार ७४३ इतकी झाली, अशी माहिती केंद्रीय आरोग्य मंत्रालयाकडून देण्यात आली. शनिवारी सकाळी ८ वाजेपर्यंतच्या नोंदीनुसार २४ तासांत २२ जणांचा करोनाने मृत्यू झाला. यातील २० मृत्यू केवळ केरळमधील आहेत. एकूण मृतांची संख्या पाच लाख २४ हजार २४ वर गेली..

LEAVE A REPLY

Please enter your comment!
Please enter your name here