हरियाणा येथील हडप्पाकालीन नगरातील स्मशानभूमीतून सापडलेल्या दोन मानवी सांगाड्यांमधून (Human Skeletons Found) गोळा केलेले ‘डीएनए’ नमुने वैज्ञानिक तपासणीसाठी पाठवण्यात आले आहेत. यातून हजारो वर्षांपूर्वी राखीगढी येथे राहणाऱ्यांचा वंश आणि त्यांच्या खाण्याच्या सवयींविषयी यावर प्रकाश पडू शकेल.
काही महिन्यांपूर्वी सापडलेले दोन महिलांचे सांगाडे जवळपास पाच हजार वर्षे पुरातन असल्याचा अंदाज आहे. मातीचे हंडे आणि इतरही भांडी या खड्ड्यात पुरलेली सापडली आहेत. ‘हिसार जिल्ह्यातील राखी खास आणि राखी शाहपूर ही दोन गावे राखीगढीच्या पुरातत्त्व जागेपाशी असून, येथील सात स्मशानभूमीत खोदण्यात आले आहे. येथे हडप्पाकालीन नगररचनेतील अवशेष असून, संबंधित महिलांचे सांगाडे दोन महिन्यांपूर्वी सापडले आहेत. त्यांचे ‘डीएनए’ दोन आठवड्यांपूर्वी गोळा केले आहेत,’ असे भारतीय पुरातत्त्व सर्वेक्षणाच्या (एएसआय) सहमहासंचालक एस. के. मंजूल यांनी सांगितले.
मुंबई महापालिकेत तब्बल २३ हजार पदे रिक्त!, कंत्राटी कामगारांवर भिस्त
मानववंशशास्त्रीय दृष्टिकोनातून फॉरेन्सिक विश्लेषणासाठी पुढे पाठवण्यापूर्वी लखनऊ येथील बिरबल साहनी इन्स्टिट्यूट ऑफ पॅलिओसायन्सेस येथे या सांगाड्यांची प्रथम तपासणी आणि वैज्ञानिक तुलना करण्यात आली. सध्याच्या उत्खननात सापडलेल्या इतर उल्लेखनीय कलावस्तू आणि पुरातन वास्तूंमध्ये स्टीटाइट सील, टेराकोटा बांगड्या, हत्तीसह हडप्पा लिपीचा समावेश आहे.
टेराकोटातून तयार केलेले कुत्रे, बैल, तांब्याच्या वस्तू, सेमी-प्रेशिअस स्टोन्स यांसारख्या अनेक गोष्टी या उत्खननात सापडल्या असल्याचे उत्खनन अभ्यासकांपैकी एक असलेल्या बडोद्यातील पीएचडी स्कॉलर दिशा अहलुवालिया यांनी सांगितले.
