करोनाकरिता चाचणी अहवाल प्राप्त झालेल्यांमध्ये नगर शहरातील सर्जेपुरा येथील २३, अकोले १, राहुरी ३, पाथर्डी तालुक्यातील १५ व कोपरगाव येथील १४ व्यक्तींचे चाचणी अहवाल सामाविष्ट आहेत. जिल्हा शल्य चिकित्सक डॉ. प्रदीप मुरंबीकर यांनी ही माहिती दिली.
जिल्ह्यामध्ये आतापर्यंत २६ ‘करोना’बाधित रुग्ण आढळले आहेत. यापैकी तीन रुग्णांच्या चौदा दिवसानंतर करण्यात आलेल्या दोन्ही स्त्राव नमुना चाचणीचे अहवाल निगेटिव्ह आल्याने त्यांना हॉस्पिटलमधून डिस्चार्ज देण्यात आला आहे. सध्या बूथ हॉस्पिटलच्या ‘आयसोलेशन वार्ड’मध्ये २१ व जिल्हा रुग्णालयात २ ‘करोना’बाधित रुग्णांवर उपचार सुरू आहेत. ‘करोना’बाधित रुग्णांच्या संपर्कात आलेल्यांना आरोग्य विभागाकडून ताब्यात घेतले जात असून, त्यांचे स्त्राव नमुने तपासणीसाठी पुण्याला पाठवले जात आहेत.
शुक्रवारी (१० एप्रिल ) कोपरगाव येथील महिलेचा ‘करोना’चा अहवाल पॉझिटिव्ह आला होता. त्यामुळे त्या महिलेच्या संपर्कात असलेल्या व्यक्तींचे स्त्राव नमुने घेऊन ते तपासणीसाठी पाठवण्यात आले होते. त्याशिवाय, पाथर्डी तालुक्यातील माणिकदौंडी येथील काही व्यक्तींचे स्त्राव नमुनेही पाठविण्यात आले होते. कोपरगाव व पाथर्डी तालुक्यातील व्यक्तींच्या स्त्राव नमुन्यांसह आज सर्जेपुरा, अकोले व राहुरी येथील व्यक्तींच्या स्त्राव नमुना चाचणीचे अहवाल पुणे येथून जिल्हा रुग्णालयात प्राप्त झाले असून हे सर्व अहवाल निगेटिव्ह आले आहेत.
तालुकानिहाय करोनाबाधित:
नगर – ११, जामखेड – ६, संगमनेर – ४, राहाता – १, नेवासे – २, कोपरगाव – १, आष्टी (जि. बीड) – १, एकूण – २६ . (एकूण रुग्णांपैकी ४ जण परदेशी नागरिक आहेत.)
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
