नवी मुंबई : तळोजा कारागृहात शिक्षा भोगत असलेल्या व उपचारासाठी मुंबईतील जे. जे. रुग्णालयात नेण्यात आलेल्या एका कैद्याने शौचालयाला जाण्याचा बहाणा करून खिडकीतून पलायन केल्याची घटना उघडकीस आली. प्रदीप रामाजू पाल (३०) असे या आरोपीचे नाव आहे. त्याच्याविरोधात सर जे. जे. मार्ग पोलिसांनी गुन्हा दाखल करून त्याचा शोध सुरू केला आहे.
प्रदीप भांडुपमधील टेंभीपाडा येथे राहण्यास असून बोरिवली रेल्वे पोलिसांनी त्याला चोरीच्या गुह्यात अटक करून त्याची ठाणे कारागृहात रवानगी केली होती. पाच महिन्यांची शिक्षा ठोठावण्यात आल्यानंतर २३ एप्रिल रोजी त्याची रवानगी तळोजा कारागृहात करण्यात आली. प्रदीपने आरोग्याशी संबंधीत तक्रार केल्यानंतर ५ मे रोजी दुपारी त्याच्यासह दोन कैद्यांना पोलिस बंदोबस्तात उपचारासाठी मुंबईतील जे. जे. रुग्णालयात नेण्यात आले. तेथील डॉक्टरांनी दोन्ही आरोपींच्या विविध चाचण्या करून त्यांना दुपारी २ वाजण्याच्या सुमारास दुसऱ्या मजल्यावरील वॉर्ड क्र.८मध्ये पुढील उपचारासाठी दाखल करून घेतले होते. ठाणे : धाड टाकल्यानंतर घरात सापडले ३० कोटी रुपये; ६ कोटींवर पोलिसांनीच डल्ला मारला?
त्यामुळे आरोपींवर देखरेख करण्यासाठी नवी मुंबई पोलिस दलातील तीन पोलिस कर्मचाऱ्यांना बंदोबस्तावर नेमण्यात आले. पहाटे पावणेदोन वाजण्याच्या सुमारास प्रदीप शौचालयात गेला. शौचालयातील खिडकीच्या काचा व लोखंडी सुरक्षाजाळी काढून खिडकीला लागून असलेल्या पाइपच्या साहाय्याने खाली उतरून पलायन केले. बराच वेळ होऊन गेल्यानंतर तो बाहेर न आल्याने पोलिसाने त्याला आवाज दिला. मात्र, आतून काहीच प्रतिसाद आला नाही. त्यामुळे पोलिसाने आपल्या इतर दोन सहकाऱ्यांना बोलावून घेतले. यानंतर त्यांनी सुरक्षारक्षकांच्या मदतीने शौचालयाचा दरवाजा तोडला. यावेळी प्रदीपने खिडकीतून पलायन केल्याचे त्यांच्या निदर्शनास आले. त्यानंतर बंदोबस्तावर असलेल्या पोलिसांनी प्रदीपचा आजूबाजूच्या परिसरात, तसेच रेल्वे स्थानकावर शोध घेण्याचा प्रयत्न केला. मात्र तो कुठेच सापडला नाही. अखेर सर जे. जे. मार्ग पोलिस ठाण्यात तक्रार दाखल करण्यात आली.
ठाणे : धाड टाकल्यानंतर घरात सापडले ३० कोटी रुपये; ६ कोटींवर पोलिसांनीच डल्ला मारला?
