म. टा. विशेष प्रतिनिधी, मुंबई ः महापालिकेच्या सर्व रुग्णालयांमध्ये औषधांचा पुरवठा होत नसल्यामुळे रुग्णांना बाहेरून औषधे आणण्यास सांगितले जात आहे. औषधखरेदीसाठी निविदा मागवण्यात सात ते आठ महिने लागत आहे. त्यामुळे पालिकेच्या रुग्णालयांत औषधपुरवठ्यात मोठ्या प्रमाणात घट होत असल्याकडे काँग्रेसने पालिका आयुक्त इकबालसिंह चहल यांना पत्र पाठवून त्यांचे लक्ष वेधले आहे.

मुंबई, ठाणे, नवी मुंबईसह राज्याच्या कानाकोपऱ्यातून रुग्ण वैद्यकीय उपचारांसाठी पालिकेच्या रुग्णालयांत येत असतात. हे गोरगरीब रुग्ण आर्थिक दुर्बल घटातील असून, त्यांच्याकडे पैसे नसल्यामुळे ते पालिकेच्या रुग्णालयांमध्ये दाखल होतात. गेल्या काही दिवसांपासून पालिकेच्या सर्वच रुग्णालयांमध्ये औषधाचा पुरेसा पुरवठा नसल्यामुळे या रुग्णांचे हाल सुरू आहेत. रुग्ण आणि त्यांच्या नातेवाइकांना खासगी औषध दुकानांतून औषधे विकत घ्यावी लागत आहेत. आधीच उपचारांसाठी खिशात पैसे नसतात. त्यात बाहेरून औषधे विकत घ्यावी लागत असल्याने शहरी आणि ग्रामीण भागांतून आलेल्या रुग्णांची परवड होत आहे, असे काँग्रेस नेते आणि माजी विरोधी पक्षनेते रवी राजा यांनी या पत्रात म्हटले आहे.

एखाद्या रुग्णास औषध न मिळाल्यामुळे त्याचा मृत्यू होऊ शकतो. त्यास जबाबदार कोण, असा सवाल करत राजा यांनी याचे खापर पालिकेच्या मध्यवर्ती खरेदी प्राधिकरणावर फोडले आहे. औषधखरेदीसाठी आवश्यक प्रशासकीय प्रक्रिया व निविदा मागवण्यात खरेदी प्राधिकरण विलंब लावत आहे. त्यामुळे रुग्णालयांत औषधपुरवठा होत नाही, असा दावा राजा यांनी केला आहे. दरम्यान, याबाबत संबंधित अधिकाऱ्यांकडे माहिती घेतली असता, चीनमध्ये पुन्हा करोनाचा उद्रेक झाल्याने त्याचा परिणाम औषधनिर्मितीवर होत असल्याचे सांगण्यात आले आहे.

चीनमधील करोनाचा फटका

चीनमध्ये औषधांसाठी सर्वाधिक स्वस्त कच्चा माल मिळतो.भारतीय औषधनिर्मिती कंपन्या चीनच्या शांघायमधून हा कच्चा माल खरेदी करतात. मात्र, करोनाच्या उद्रेकामुळे कच्या मालाची बाजारपेठ थंडावली आहे. त्याचा फटका भारतासह आशियातील इतर देशांनाही बसला आहे. ज्या औषध कंपन्यांकडे आधीच्या मालाचा साठा आहे, ते औषध दुकानांना पुरवठा करतात. पालिका रुग्णालयात औषध उपलब्ध असेल, तर ते रुग्णांना विनामूल्य दिले जाते. नसल्यास बाहेरून विकत आणण्याशिवाय पर्याय नाही, अशी माहिती या अधिकाऱ्याने दिली. गेल्या काही महिन्यांपासून सातत्याने पेट्रोल आणि डिझेलच्या किंमतीत मोठी वाढ झाली आहे. त्याचा परिणाम औषधांची खरेदी आणि किंमतीवर झाला असल्याचेही या अधिकाऱ्याने स्पष्ट केले आहे.

LEAVE A REPLY

Please enter your comment!
Please enter your name here