'रोल मॉडल' आग्र्यात करोनाचा 'यू टर्न'!

आग्रा, उत्तर प्रदेश: आग्रामध्ये करोनाबाधितांच्या संख्येनं पुन्हा एकदा ‘यू टर्न’ घेतल्याचं पाहायला मिळतंय. आग्र्यात सोमवारी ३५ नवे रुग्ण समोर आलेत. यानंतर करोनाबाधितांची एकूण संख्या १३८ वर पोहचलीय. यापूर्वी रविवारीही आग्रामध्ये एकाच दिवशी १२ नवीन रुग्ण आढळले होते. याशिवाय फतेहपूर सिक्रीमध्ये १४ नवे रुग्ण आढळलेत. क्लस्टर प्रतिबंध धोरणाचा अवलंब केल्यानंतर जिल्ह्यात करोना फैलावावर नियंत्रण मिळवण्यात यश आलं होतं. परंतु, आता मात्र इथं पुन्हा एकदा करोना रुग्णांची संख्या वाढताना दिसतेय.

केंद्रीय आरोग्य मंत्रालयाचे संयुक्त सचिव लव अग्रवाल यांनी शनिवारी दिल्लीत पत्रकार परिषदेत ‘ मॉडल’चा उल्लेख ” असा केला होता. संपूर्ण देशानं हे मॉडेल फॉलो करायला हवं, अशी पुश्तीही त्यांनी जोडली होती. यावेळी, त्यांनी उत्तर प्रदेशचे मुख्यमंत्री योगी आदित्यनाथ यांचं कौतुकही केलं. परंतु, पुढच्याच दिवशी अर्थात रविवारी आग्र्यात १२ नवे करोनाबाधित रुग्ण आढळले. त्यानंतर आज ३५ जण नवीन रुग्ण सापडले. आज आग्र्यातील करोनाबाधितांची संख्या राज्यातील इतर जिल्ह्यांपेक्षा सर्वाधिक आहे.

आग्र्यात आढळलेले नवीन रुग्ण पारस या खासगी रुग्णालयाशी तसंच त्यांच्या संपर्कात आलेले आहेत. पारस रुग्णालय सध्या सर्वात मोठं करोना हॉटस्पॉट ठरलंय. याच रुग्णालयात २० करोनाबाधित आढळलेत. या रुग्णालयात उपचारासाठी हाथरस, अलीगड आणि फिरोजाबादहूनही अनेक रुग्ण दाखल होतात.

या रुग्णालयात ढोली खास इथली एक ६५ वर्षीय महिला किडनीच्या त्रासावर उपचारासाठी दाखल झाली होती. परिस्थिती आणखीनच बिघडल्यानंतर तिला मथुराच्या नयति रुग्णालयात दाखल करण्यात आलं. इथं या महिलेची करोना चाचणी पॉझिटिव्ह आली. त्यानंतर पारस रुग्णालयाला सील करण्यात आलं आणि रुग्णांना डिस्चार्ज देण्यात आला. इथं दररोज २५० – ३०० रुग्ण उपचारासाठी येतात.

त्यामुळे, २२ मार्च ते ६ एप्रिल या काळात रुग्णालयात आलेल्या रुग्णांची माहिती कंट्रोल रुमला देण्याचं आवाहन करण्यात आलंय. करोनाबाधित महिलेच्या संपर्कात येणाऱ्यांची चौकशी सुरू झाल्यानंतर आणखी १६ रुग्ण आढलले. त्यानंतर पारस रुग्णालयाला क्वारंटाईन सेंटर बनवण्यात आलंय.

आग्र्याचं बहुचर्चित क्लस्टर मॉडल

या दरम्यान आग्र्याच्या बहुचर्चित क्लस्टर मॉडलवरही प्रश्नचिन्ह उपस्थित होतंय. आग्र्यात करोना संक्रमण रोखण्यासाठी ‘क्लस्टर मॉडल’चा वापर २ मार्चपासून सुरू करण्यात आला. यामध्ये एपिसेंटर १-२ नुसार ३ किलोमीटर परिसरात कन्टेन्मेंट आणि ५ किलोमीटरमध्ये बफर झोन बनवण्यात आले. एपिसेंटर १ च्या क्षेत्रात १५ शहरी प्राथमिक आरोग्य केंद्रांचा समावेश करण्यात आला… आणि प्रत्येक रुग्णाचा कॉन्टक्ट ट्रेसिंग करण्यात आलं.

दोन सदस्य असलेल्या तब्बल १२४८ टीम अभियानात उतरल्या. यामध्ये आशा आणि आंगनवाडी सेविकांचा समावेश करण्यात आला. संपूर्ण क्षेत्रातील १.६ लाख घरांमध्ये जाऊन ९,९०,६९१ लोकांची तपासणी करण्यात आली. यावेळी २५०० लोकांमध्ये करोनाची लक्षणं आढळली होती. यातील ३६ रुग्ण २८ दिवसांच्या काळात परदेश प्रवासाहून परतले होते. याशिवाय, प्रत्येक क्षेत्राचा मायक्रोप्लान बनवून स्मार्ट सिटी केंद्र वॉररुममध्ये परावर्तित करण्यात आली.

परंतु, हे मॉडलही दोषपूर्ण पद्धतीनं राबवण्यात आल्याचं आता करोनाबाधितांची वाढती संख्या पाहून लक्षात येतंय.