केदार ओक
खाली आलेला बाजार ही गुंतवणूकदारांसाठी एक चांगली संधी आहे. मागील किमान पातळी बाजार गाठतो का ते आता पाहायचं आहे. निफ्टीची १५,२०० आणि सेन्सेक्सची ५२,००० किंवा ५१,६०० ही पातळी येते की इथून बाजार परत थोडी तेजी दाखवतो हे पहाणं आता महत्वाचं आहे. सोमवारी बाजार सकारत्मक कल दाखवेल, असा अंदाज आहे. जागतिक बाजार शुक्रवारी बंद होताना सकारात्मक स्तरावर बंद झाले आहेत. मागील गुरुवारीही बाजार सकारात्मक बंद झाले होते. त्याचा परिणाम शुक्रवारी सुरुवातीला चांगला दिसला. पण बाजार बंद होताना पुन्हा विक्रीचा जोर वाढला आणि शुक्रवारी बाजार बंद होताना सेन्सेक्स ५२,७९३ (-१३६) आणि निफ्टी १५,७८२ (-२५) वर बंद झाला.

जागतिक बाजाराचा अंदाज घेता अजूनही आर्थिक क्षेत्रात स्थिरता नाही. डॉलरचे मूल्य वाढत असून, महागाईच्या झळा अजून काही काळ जाणवतील असं वाटत आहे. कच्च्या खनिज तेलाचे दर अजूनही १०० डॉलरच्या वर आहेत. आपल्या मध्यवर्ती बँकेने जरी व्याजदरात वाढ केली असली तरी त्याचा परिणाम दिसायला तीन महिने लागतील. महागाई आटोक्यात न आल्यास पुढील पतधोरणात त्याचा परिणाम पुन्हा व्याजदर वाढण्यात होईल. अर्थात नाही म्हटलं तरी त्याचा परिणाम मागणीवर होईल. त्यामुळे या काळात थोडा दीर्घ गुंतवणुकीचा मार्ग जास्त फायद्याचा ठरेल. एका महिन्यात ४.५० टक्के परतावा मिळण्याची चांगली संधी या काळात गुंतवणूकदारांना आहे. माझा अंदाज खरा किंवा योग्य ठरल्यास वर्षाला किमान २० टक्के परतावा नक्कीच या गुंतवणुकीतून मिळेल. गुंतवणुकीसाठी चांगली संधी बाजार कसा उपलब्ध करून देतो ते सोबत दिलेल्या टाटा स्टील या कंपनीच्या उदाहरणावरून लक्षात येईल.

पुढील आर्थिक सक्षमतेची संधी दवडू नका. करोनानंतर जसा बाजार एकदम वाढला तसा यावेळी एकदम वाढणार नाही. पण आपला पुढील आर्थिक प्रवास नक्कीच फलदायी असेल एवढं मात्र नक्की. येता आठवडा हा खूप महत्त्वाचा आहे. या आठवड्यात बाजार ‘बॉटम आऊट’ होईल असा अंदाज आहे. तीन आठवडे प्रत्येक ३० टक्के गुंतवणूक हे धोरण ठेवलं असेल तर हा शेवटचा आठवडा आहे. येणारा पावसाळा तेजीचा पाऊस घेऊन येईल ही अपेक्षा.

पोर्टफोलिओ तयार करण्यासाठी योग्य वेळ
आपला गुंतवणूक पोर्टफोलिओ कसा असावा यासाठी पुढील टक्केवारी देत आहे. ही टक्केवारी पूर्वी दिलेली असली तरीही ती पुनःपुन्हा डोळ्यांसमोर राहिली तरच त्याबरहुकूम निर्णय घेता येतील.

गुंतवणूक क्षेत्र गुंतवणूक (टक्के)

बँकिंग अॅण्ड फायनान्स १६

डायव्हर्सिफाइड १५

ओषधनिर्माण (फार्मा) १२

तंत्रज्ञान १४

एफएमसीजी ११

विमा ७

वाहन उद्योग १०

तेल, सिमेंट, इलेक्ट्रिक, रसायने १५

टाटा स्टील
– प्रति समभाग ५१ रुपये लाभांश जाहीर

– लाभांश नोंदणी दिनांक १८ जून

– समभागाची सध्याची किंमत १,०९७ रुपये

टाटा स्टीलमध्ये गुंतवणूक करण्याचा विचार केल्यास

– १०० समभाग खरेदी केले तर गुंतवणूक होईल १,०९,७०० रुपये

– प्रति समभाग लाभांश ५१ रुपये याप्रमाणे १०० समभागांना मिळतील ५,१०० रुपये

अशी असेल पुढील वाटचाल

या समभागांचे दर्शनी मूल्य कंपनीकडून १० रुपयांवरून १ रुपया करण्यात येणार आहे. त्याकरता नोंदणी तारीख जाहीर झालेली नाही. म्हणजे तुमच्याकडील १०० समभागांचे १,००० समभाग होतील. अर्थात त्याप्रमाणे मूल्य निश्चित होईल. सध्याची किंमत गृहित धरली तरी, आपली किंमत प्रति समभाग साधारण १०९-११० रुपये इतकी होईल. सध्या या समभागात खूप पडझड झाली असल्यामुळे पुढील नऊ ते १२ महिन्यांत या समभागांमध्ये १० टक्के ते २० टक्के वाढ जरी झाली, म्हणजे या समभागाची किंमत २० रुपयांनी किंवा अगदी ३० टक्क्यांनी वाढली तरी चांगला परतावा मिळेल. एवढा परतावा कोणतीच बँक देणार नाही.

LEAVE A REPLY

Please enter your comment!
Please enter your name here