पुणे: मनसेप्रमुख राज ठाकरे यांच्या पुण्यातील सभेला पोलिसांकडून परवानगी देण्यात आल्याची माहिती समोर आली आहे. याबाबत अधिकृत घोषणा झाली नसली तरी राज ठाकरे यांच्या सभेला परवानगी मिळण्याची केवळ औपचारिकताच बाकी राहिली आहे. त्यानुसार आता २१ मे रोजी पुण्यात राज ठाकरे (Raj Thackeray) यांची सभा होणार आहे. काही कायदेशीर सोपस्कार पार पडल्यानंतर पोलिसांकडून मनसेच्या सभेला परवानगी दिल्याचे अधिकृतरित्या जाहीर केले जाईल. मात्र, सभेची परवानगी जवळपास निश्चित असल्याने पुण्यातील मनसेच्या गोटात हालचालींना वेग आला आहे. या पार्श्वभूमीवर मनसेचे शहराध्यक्ष साईनाथ बाबर आणि मनसे नेते बाबू वागस्कर हे राज ठाकरे यांच्या भेटीसाठी रवाना झाले आहेत.
‘भोंग्यांच्या मुद्द्याचा मनसेला फायदा होईल, प्रत्येक महानगरपालिकेत ४-५ नगरसेवक निवडून येतील’
काहीवेळापूर्वीच गृहमंत्री दिलीप वळसे-पाटील यांनी मुंबईत पत्रकार परिषद घेतली होती. यावेळी त्यांना राज ठाकरे यांच्या पुण्यातील सभेबाबत विचारणा करण्यात आली. त्यावर गृहमंत्र्यांनी म्हटले की, राज ठाकरे (Raj Thackeray) यांच्या पुण्यातील सभेला परवानगी नाकारण्याचे कारण दिसत नाही. पोलीस आयुक्त या सभेला परवानगी देतील. मात्र, मनसेने पोलीस आयुक्तांनी घालून दिलेल्या नियमांचे पालन करावे, असे वळसे-पाटील यांनी सांगितले होते. त्यानंतर काही क्षणांतच मनसेच्या गोटातून सभेला परवानगी मिळाल्याची माहिती समोर आली आहे. त्यामुळे आता राज ठाकरे २१ मे रोजी होणाऱ्या सभेत काय बोलणार, याकडे साऱ्यांच्या नजरा लागल्या आहेत.

डेक्कन जिमखान्याच्या परिसरातील मुठा नदीपात्रात मनसेची ही सभा होणार आहे. याठिकाणी यापूर्वीही मनसेच्या सभा झाल्या आहेत. याठिकाणी सभा घेतल्या वाहतूक कोंडीचा प्रश्न निर्माण होणार नाही. आम्ही याबाबत संबंधित यंत्रणांचे नाहरकत पत्र आपल्याला देऊच. तरी आपण सदर ठिकाणी स्टेज , बॅरिकेट आणि विद्युत व्यवस्थेसाठी मनोरे उभारण्याची परवानगी द्यावी. तसेच स्पीकरच्या वापरासाठीही परवानगी द्यावी, असे मनसेने डेक्कन जिमखाना पोलिसांना दिलेल्या पत्रात नमूद करण्यात आले होते. या सभेची परवानगी जवळपास निश्चित असली तरी पोलीस कोणते निर्बंध घालणार का, हे पाहावे लागेल.

LEAVE A REPLY

Please enter your comment!
Please enter your name here