राज्यात आज ३५२ नवे करोना रुग्ण; ११ मृत्यू

मुंबई: महाराष्ट्रात आज एकाच दिवशी करोनाचे तब्बल ३५२ नवीन रुग्ण आढळल्याने तसेच २४ तासांत ११ रुग्ण दगावल्याने आरोग्य यंत्रणेसाठी मोठे आव्हान निर्माण झाले आहे. राज्य सरकारच्या आकडेवारीनुसार राज्यात एकूण करोनाबाधितांची संख्या आता २ हजार ३३४ इतकी झाली आहे. मुंबई, पुण्यात रुग्णांची संख्या झपाट्याने वाढत असतानाच आज नाशिक जिल्ह्यातील मालेगावात १४ नवीन रुग्ण आढळून आल्याने प्रशासन हादरलं आहे.

आज दिवसभरातील करोना साथीचा तपशील राज्य सरकारच्या आरोग्य विभागाकडून जारी करण्यात आला आहे. त्यानुसार मुंबईत करोनाचे सर्वाधिक २४२ नवे रुग्ण आज विविध रुग्णालयांत दाखल झाले आहेत. त्याखालोखाल पुण्यात २४ तासांत करोनाचे ३९ नवे रुग्ण आढळले आहेत. त्यानंतर मालेगाव आणि नागपूरमधील आजचे आकडे चिंता वाढवणारे ठरले आहेत. मालेगाव पालिका हद्दीत आज करोनाचे १४ नवीन रुग्ण आढळले तर नागपूर पालिका हद्दीत ११ नवीन रुग्ण आढळले आहेत. त्यानंतर ठाणे पालिकेच्या हद्दीत ९ नवीन रुग्णांची नोंद झाली आहे.

करोनाचा आजचा तपशील

अहमदनगर- १
औरंगाबाद- ४
बुलडाणा- ४
धुळे- १
कल्याण-डोंबिवली- ४
मालेगाव- १४
मिरा-भाईंदर- ७
मुंबई- २४२
नागपूर- ११
नाशिक- १
नवी मुंबई- १
पनवेल- १
पिंपरी चिंचवड- ६
पुणे- ३९
रायगड- १
ठाणे- ९
वसई-विरार- ५
यवतमाळ- १

एकूण रुग्ण- ३५२

राज्यात आज ११ करोनाबाधीत रुग्णांचा मृत्यू झाला. त्यात मुंबईतील ९ रुग्णांचा समावेश आहे तर पुण्यात एक रुग्ण आणि मिरा भाईंदरमध्ये एक रुग्ण दगावला.