प्राप्त अहवालानुसार, करोना विषाणूचा अंश आढळलेला ९ रुग्णांमुळे सतरंजीपुराच्या पॉझिटिव्ह रुग्णाच्या संपर्कात आलेल्यांची साखळी देखील तब्बल ३० ने वाढली आहे. त्यामुळे या मधल्या काळात विषाणूचे वाहक बनून फिरलेल्या या सर्वांच्या सहवासातील व्यक्ती शोधण्याचे आव्हान प्रशासनासमोर वाढले आहे.
एम्सच्या विषाणू प्रयोगशाळेत तपासलेल्या घशातील द्रवाच्या ३१ नमुन्यांपैकी मंगळवारी सहा जण पॉझिटिव्ह आले. यात एका ७० वर्षीय ज्येष्ठ व्यक्तीसह १९, २८ व ४५ वर्षीय तरुण, तर ४५ व ५० वर्षीय महिलेचा समावेश आहे. हे सर्व जण मेयोमध्ये उपचारादरम्यान गेल्या रविवारी दगावलेल्या पॉझिटिव्ह रुग्णाचे नातेवाईक असल्याचे सांगितले जात आहे. तसेच शासकीय वैद्यकीय महाविद्यालय व रुग्णालयाच्या प्रयोगशाळेने तपासलेल्या घशातील नमुन्यांमध्ये सतरंजीपुरा येथील पॉझिटिव्ह रुग्णाच्या सहवासात आल्याने करोनाची लागण झालेल्यांमध्ये अनुक्रमे ८ व १८ वर्षे वयोगटातल्या मुलींसह ५८ वर्षीय पुरुषाचाही समावेश आहे.
मंगळवारी पॉझिटिव्ह अहवाल आलेल्यांपैकी काही जण आमदार निवासातल्या सक्तीच्या एकांतवास कक्षात दाखल करण्यात आले होते. त्यामुळे संस्थात्मक एकांतवासातील संशयितांवर सध्या लक्ष केंद्रित केले जात आहे. या घडामोडीत करोनाचा प्रसार बजाज नगर, खामला, जरिपटका, सतरंजीपुरा, मोमिनपुरा, काटोल रोड अशा चोहोबाजूंनी वाढत असल्याने नागपूरकरांच्या चिंतेत दिवसागणिक वाढ होत आहे. त्यामुळे आता करोना विषाणूच्या नवीन साखळ्यांची मालिका तयार होत आहे.
दैनिक संशयित : ५८
एकूण संशयित : ११३२
सध्या भरती संशयित : ९४
एकूण भरती संशयित : १०७३
एकूण भरती सकारात्मक रुग्ण- ४५
दैनिक तपासणी नमुने: ४३
एकूण तपासणी नमुने: १३७२
आतापर्यंत पॉझिटिव्ह नमुने: ५६
घरी सोडलेले सकारात्मक रुग्ण : ८
घरी सोडलेले संशयित : ९७८
आज अलगीकरण केलेले संशयित: २२
अलगीकरण कक्षात भरती संशयित- ४६७
अलगीकरण कक्षातून घरी पाठविलेले संशयित- १२८
अलगीकरण कक्षातून रुग्णालयात पाठविलेले संशयित- ६
पाठपुरावा सुरु असलेले एकूण संशयित- १२८६
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
