संभाजीराजे छत्रपती यांना राज्यसभा उमेदवारी नाकारणे आपल्याला राजकीयदृष्ट्या परवडणारे नाही, असे या आमदारांच्या गटाचे म्हणणे आहे. त्यामुळे १० जून रोजी होणाऱ्या राज्यसभा निवडणुकीत हे आमदार काय भूमिका घेतात, याकडे पाहावे लागेल. शिवसेनेने संभाजीराजे यांच्यासमोर सहावा उमेदवार रिंगणात उतरवला तर तो निवडून येईल की नाही, याची शाश्वती नाही. तर दुसऱ्या बाजूला संभाजीराजे यांचा पराभव झाला तर छत्रपती घराण्यातील व्यक्तीचा पराभव केला म्हणून मराठा समाज नाराज होण्याचा धोका आहे. आगामी निवडणुकीत संबधित आमदार किंवा राजकीय पक्षांना याची किंमत मोजावी लागेल, असा मतप्रवाह शिवसेनेच्या काही आमदारांमध्ये आहे.
शिवसेनेची खास ऑफर, पण या ५ कारणांसाठी संभाजीराजेंना ‘शिवबंधन’ बांधण्यासाठी अडचणी!शिवसेनेने संभाजीराजेंचा नाद सोडला
राज्यसभा निवडणुकीतील सहाव्या जागेसाठी शिवसेना कोणत्याही अपक्षाला पाठिंबा देणार नाही. मग तो कोणी असो. राज्यसभेच्या दोन जागांवर शिवसेनेचेच उमेदवार उभे राहतील आणि निवडून जातील, असे वक्तव्य शिवसेना नेते संजय राऊत (Sanjay Raut) यांनी केले. संजय राऊत यांच्या या वक्तव्यामुळे शिवसेनेने आता संभाजीराजे छत्रपती(Sambhajiraje Chhatrapati) यांना पक्षात आणण्याचा नाद सोडून आणखी एक उमेदवार रिंगणात उतरवण्याचे निश्चित केल्याचे स्पष्ट झाले आहे.
मराठा मोर्चा संभाजीराजे छत्रपतींसाठी मैदानात उतरणार
या सगळ्या घडामोडींनंतर आता मराठा मोर्चा सक्रिय होण्याची चिन्हे आहेत. मराठा क्रांती मोर्चाचे समन्वयक राजेंद्र कोंढारे यांनी आज दुपारी बैठक बोलावली आहे. या बैठकीत एखादा महत्त्वाचा निर्णय होऊ शकतो. संभाजीराजे छत्रपती हेदेखील मराठा समन्वयकांशी चर्चा करणार असल्याची माहिती आहे. मराठा मोर्चा समन्वयकांनी रविवारी पुण्यात शरद पवार यांची भेट घेतली होती. त्यावेळी मराठा मोर्चाने राज्यसभा निवडणुकीत राष्ट्रवादीने संभाजीराजे यांना पाठिंबा द्यावा, अशी मागणी केली होती.
शिवसेनेच्या नव्या डावपेचामुळे संभाजीराजेंचा राज्यसभेचा मार्ग खडतर दिसतोय
