ठाणे : आई रागावली म्हणून एका ११ वर्षांच्या मुलीनं घर सोडून थेट कर्जत गाठल्याची घटना उल्हासनगरमध्ये घडली आहे. सुदैवानं लोकल प्रवासात एका प्राध्यापिकेला ही मुलगी दिसली आणि त्यांनी तिची चौकशी करत समजूत काढली आणि तिला सुखरूप पुन्हा तिच्या पालकांच्या ताब्यात दिलं. त्यामुळं या मुलीच्या पालकांनी प्राध्यापिकेचे आभार मानले आहेत.

‘मी घरी आल्यावर तुला बघते’…

उल्हासनगरच्या कॅम्प ३ सम्राट अशोक नगरमधील लोकसेवा सोसायटीत राहुल शिरसाठ हे कुटुंबासह वास्तव्याला असून त्यांना खुशी ही ११ वर्षांची मुलगी आहे. मंगळवारी दुपारी खुशीची आई कामावर गेलेली असताना खुशीच्या आजीने खुशीच्या आईला फोन केला आणि खुशीची तक्रार केली. त्यावर खुशीच्या आईने ‘मी घरी आल्यावर तुला बघते’ असा दम दिल्याने खुशी घाबरली आणि दुपारी दोन वाजता घरातून निघून गेली. तिथून तिनं थेट रेल्वे स्टेशन गाठत कर्जतला जाणारी लोकल पकडली. ही लोकल कर्जतला पोहोचल्यानंतर त्याच लोकलनं तिनं मुंबईचा उलट प्रवास सुरू केला.

अगोदर मुख्यमंत्रिपदाचा राजीनामा, आता मुलाचं तिकीट नाकारलं, भाजपचा येडियुरप्पांना धक्का
प्राध्यापिकेच्या सतर्कतेमुळे अनर्थ टळला…

सुदैवानं या लोकलमध्ये कर्जतच्या एका कॉलेजमध्ये प्राध्यापिका असलेल्या शीतल बोरिटकर या बदलापूरला त्यांच्या घरी येण्यासाठी निघाल्या होत्या. त्यांना ती मुलगी एकटीच दिसल्यानं त्यांनी तिची चौकशी केली. मात्र, सुरुवातीला खुशीने त्यांना खोटी उत्तरं दिली. यानंतर तिला विश्वासात घेऊन विचारलं असता तिनं तिच्या शाळेचं नाव सांगितलं. त्यावरून बोरिटकर यांनी गुगलवरून शाळेचा नंबर काढत शाळेशी संपर्क साधला आणि खुशीच्या पालकांना याबाबत माहिती देण्यास सांगितलं.

इकडे खुशीच्या पालकांनी खुशी निघून गेल्यानंतर मध्यवर्ती पोलीस स्टेशन गाठत तक्रार केली. त्यावर वरिष्ठ पोलीस निरीक्षक मधुकर कड यांनी तातडीने सूत्रं फिरवली. यानंतर खुशी ही गोशाळेकडे जाताना सीसीटीव्हीत कैद झाल्याचं पोलिसांना आढळलं. त्यातच खुशीच्या पालकांना शाळेतून तुमच्या मुलीला एका प्राध्यापकांनी नेरळ स्टेशनला उतरवून घेतल्याची माहिती देण्यात आली. त्यानुसार मध्यवर्ती पोलिसांनी नेरळ स्टेशन गाठत संबंधित मुलीला अवघ्या काही तासात पुन्हा एकदा सुखरूप उल्हासनगरमध्ये आणलं आणि तिच्या पालकांच्या ताब्यात दिलं.

RCB vs LSG Eliminator Live Score, IPL 2022 : आरसीबी आणि लखनौच्या सामन्याचे लाइव्ह अपडेट्स
‘क्षुल्लक रागावण्यावरून माझी मुलगी निघून गेली होती’…

या सगळ्यानंतर मुलीच्या आईने प्राध्यापिका शीतल बोरिटकर यांचे आभार मानले. क्षुल्लक रागावण्यावरून माझी मुलगी निघून गेली होती. आता ती परत कधीच सापडणार नाही असं मला एका क्षणासाठी वाटून गेलं होतं. पण शीतल बोरिटकर यांच्यामुळे माझी मुलगी परत आली असून त्यांचे उपकार मी आयुष्यभर विसरणार नाही, असं खुशीची आई प्रियांका यांनी सांगितलं.

घरबसल्या फक्त १०० रुपयांत खरेदी करा सोनं ! Phonepe ने लाँच केली नवीन सर्व्हिस, पाहा डिटेल्स

LEAVE A REPLY

Please enter your comment!
Please enter your name here