पुण्यात विद्यार्थिनीचे मार्क्स ऐकून अजित पवारांनी हात जोडले आणि चांगलाच हशा पिकला! – deputy chief minister ajit pawar’s reaction to the student’s marks in the desi govansh exhibition went viral

पुणे : राष्ट्रवादीचे नेते आणि राज्याचे उपमुख्यमंत्री अजित पवार हे नेहेमीच आपल्या हटके शैलीसाठी चर्चेत असतात. कधी जाहीर सभेत आपल्या ग्रामीण लहेजात कार्यकर्त्यांचे कान टोचणे, तर कधी कार्यकर्त्यांच्या आग्रहाखातर थेट चहाच्या टपरीवर चहा पिणे, असे अजित पवार यांचे अनेक किस्से सर्वांनीच ऐकले आहेत. पुण्यातही असाच एक किस्सा समोर आला असून याबाबतचा व्हिडिओ सोशल मीडियावर चांगलाच व्हायरल झाला होता.

पुण्यात नुकतेच देशी गोवंश प्रदर्शन आणि प्रात्यक्षिकेचे उद्घाटन उपमुख्यमंत्री अजित पवार यांच्या हस्ते करण्यात आले. यावेळी प्रदर्शनाची पाहणी करताना उपमुख्यमंत्री अजित पवार हे तेथील विविध वस्तूंविषयी माहिती घेत होते. ही माहिती देणाऱ्या एका विद्यार्थिनीला अजित पवार यांनी तिचे परीक्षेतील गुण विचारले. विद्यार्थिनीने मला ९९ टक्क्यांहून अधिक गुण मिळाले असल्याचं सांगताच अजित पवारांनी थेट हातच जोडले. अजित पवारांच्या या कृतीनंतर उपस्थितांमध्ये चांगलाच हशा पिकाला.

कोणासमोर झुकून खासदारकी नको, संभाजीराजेंचा संताप; शिवसेनेबद्दल स्पष्टच बोलले…

तब्बल दीड तास गोवंश प्रदर्शनाची पाहणी आणि संवाद

सकाळी साडेसात वाजताच्या ठरलेल्या वेळेपूर्वीच उपमुख्यमंत्री अजित पवार प्रदर्शनस्थळी पोहोचले. देशी गाईंच्या गोठ्याचे व्यवस्थापन, जनावरांचे औषधोपचार, जैव मिश्रण, देशी गाईंच्या शेणखताचा उपयोग, गोमुत्राचा उपयोग, व्हर्मीवॉश तसेच दुग्धव्यवसायाच्या आणि गोसंवर्धनाच्या संदर्भातील बारकाव्याबाबत त्यांनी सबंधितांना प्रश्न विचारले. ट्रॅक्टर संचलित मुरघास यंत्र, आजारी असताना जनावरे उचलणी यंत्र तसंच नवीन अवजारांचीही माहिती त्यांनी जाणून घेतली. दुधापासून अन्य पदार्थ बनवणाऱ्या विभागाचीही त्यांनी पाहणी केली.

मजूर महिलांची विचारपूस

चाराकापणीचे काम करणाऱ्या छबुबाई कामठे यांच्याशी अजित पवार यांनी संवाद साधला. चाराकापणीचे काम कसे चालते, चारा किती दिवस टिकतो, वेतन किती मिळते अशी आस्थेवाईकपणे विचारपूस केली. त्यांच्यासोबत असणाऱ्या इतर मजूर महिलांचीही अजित पवार यांनी विचारपूस केल्याचं पाहायला मिळालं.