महादेवराव महाडिक विधान परिषद आमदार, धनंजय महाडिक खासदार, अमल महाडिक आमदार, शौमिका महाडिक जिल्हा परिषद अध्यक्षा अशी अनेक पदे एकेकाळी महाडिक परिवारात होती. महापालिका, जिल्हा परिषद, गोकुळ, बाजार समितीवर महाडिक गटाची सत्ता होती. पण पालकमंत्री सतेज पाटील यांनी त्यांच्या एकेक सत्तेला सुरूंग लावत गेले. यातून पदे आणि सत्ता यापासून महाडिक गट दुरावला.
लोकसभा, विधानपरिषद, विधानसभा आणि गोकुळ निवडणुकीत धनंजय महाडिक, महादेवराव महाडिक, अमल महाडिक आणि महाडिक गटाचा पराभव झाला. सहा महिन्यापूर्वी झालेल्या विधान परिषद निवडणुकीत राज्यपातळीवर झालेल्या घडामोडीमुळे अमल महाडिक यांना माघार घ्यावी लागली. कोल्हापूर उत्तरच्या पोटनिवडणुकीत महाडिक यांचे भाचे सत्यजित कदम यांना पराभव स्वीकारावा लागला. गेल्या सहा वर्षात एका पाठोपाठ एक पराभव पचवावे लागत असल्याच्या पार्श्वभूमीवर राज्यसभा निवडणुकीत कोणत्याही परिस्थितीत विजयाचा गुलाल उधळायचाच या निश्चयाने सध्या महाडिक परिवार प्रचारात उतरला आहे.
शिवसेनेनं आणखी एका जिल्हाप्रमुखाला दिलं निष्ठेचं बक्षीस; आमशा पाडवी कोण आहेत?
भाजपने सहाव्या जागेसाठी धनंजय महाडिक यांना उमेदवारी दिली. त्यांच्याविरोधात शिवसेनेचे संजय पवार मैदानात आहेत. दोन्ही उमेदवार कोल्हापूरचेच आहेत. संजय पवार मुंबईत ठाण मांडून आमदारांच्या भेटीगाठी घेत आहेत. महाडिक यांच्यासाठी मात्र त्यांचे कुटुंबातील अनेकजण सध्या पायाल भिंगरी लावून फिरत आहेत. धनंजय महाडिक यांचे काका महादेवराव महाडिक, चुलत भाऊ माजी आमदार अमल महाडिक, स्वरूप महाडिक, राहूल महाडिक, सम्राट महाडिक, राजू महाडिक, सनी महाडिक, जिल्हा परिषदेच्या माजी अध्यक्षा शौमिका महाडिक यासह महाडिक यांच्या पत्नी अरूंधती तसेच त्यांची पृथ्वीराज, कृष्णराज, यशोराज ही तीनही मुलं सध्या राज्याच्या विविध भागात असलेल्या आमदारांच्या भेटीगाठी घेत आहेत.
या भेटीसाठी २५ टीम तयार करण्यात आल्या आहेत. त्यामध्ये भाजपचे पदाधिकारी, आजी माजी नगरसेवक, आजी माजी जिल्हा परिषद सदस्य, साखर कारखान्याचे संचालक, धनंजय महाडिक युवा शक्तीचे पदाधिकारी यांचा समावेश आहे. आतापर्यंत या महाडिक कुटुंबीयांनी हितेंद्र ठाकूर, अबु आझमी, बच्चू कडू, विनोद निकोले यांच्यासह अनेकांच्या भेटी घेतल्या आहेत. केवळ अपक्षच नव्हे तर सर्वपक्षीय आमदारांच्या भेटी घेण्यासाठी त्यांनी नियोजन केले असून त्यानुसार त्यांची टीम कार्यरत झाली आहे.
