अंगावर अडीच किलोच्या सोन्याच्या दागिन्यांमुळे चांद्यापासून बांद्यापर्यंत हरएक माणसासमोर रमेश वांजळे यांचं केवळ नावच नव्हे तर नजरेसमोर करारी बाण्याचा ‘सोनेरी माणूस’ उभा राहायचा. पण त्याचबरोबर त्यांची सावली म्हणून वावरणारे त्यांचे अंगरक्षक उमेश वसवे हे देखील संपूर्ण महाराष्ट्राला सुपरिचित होते. तब्बल ७ फूट उंची आणि १६५ किलो वजन असलेले उमेश वसवे महाराष्ट्राचे ‘खली’ म्हणून प्रसिद्ध होते. अशी प्रचंड शरीर संपत्ती लाभलेले उमेश गेल्या २ वर्षांपासून आजाराशी झगडत आहेत. आता त्यांच्यावर शस्त्रक्रिया होणार असल्याने त्यांच्या मदतीसाठी वसंत तात्या सरसावले आहेत तसेच जनतेकडेही आर्थिक मदतीचं आवाहन केलं आहे.
वसंत मोरे यांनी फेसबुक पोस्टमध्ये काय म्हटलंय?
“महाराष्ट्राच्या खलीला तुमच्या मदतीची गरज आहे. सोनेरी आमदार रमेशभाऊंचा अंगरक्षक उमेश रमेश वसवे, रा. सिंहगड वसवेवाडी, वय अवघे ४० वर्षे, उंची तब्बल ७ फूट, वजन १६५ किलो…. अशी प्रचंड शरीर संपत्ती लाभलेला उमेश गेल्या २ वर्षांपासून आजाराशी झगडत आहे. होतं नव्हतं ते सगळे जगण्याच्या धडपडीत गमावून बसलाय. लोकांना सुरक्षा देणारा खली आज जगण्यासाठी ढसाढसा रडताना मी पाहिलाय. पुण्यातील एका नामांकित बिल्डरने त्याचे कष्टाचे पैसे बुडवलेत.मी त्या बिल्डरला फोन केला तर पैसे नाहीत बोलला. ठीक आहे त्याला मी थोडा सवडीने बघतो. पण मित्रांनो हा उमेश म्हणजे आपल्या महाराष्ट्राची संपत्ती आहे. जर त्याने या महिन्यात त्याच्या गळ्यावर आणि पाठीवर शस्त्रक्रिया केली नाही तर कदाचित ही आपली मराठी माणसाची संपत्ती मातीत ही मिळेल”
आधी महाआरती केली, नंतर मुस्लीम कार्यकर्त्याच्या घरी जेवण; वसंत मोरेंची पुन्हा चर्चा
“उमेश वासवे यांचं नाशिकला ऑपरेशन करायचं आहे. तेव्हा माझी तुम्हाला हात जोडून विनंती आहे, उमेशला जमेल तशी यथाशक्ती मदत करा. तुमचे १०० ते ५०० रु. सुद्धा हा धिप्पाड मराठी देह वाचवू शकतात. कारण ही असली माणसं परत परत जन्म घेत नाही. तेव्हा प्लीज मदत करा…”, असं कळकळीचं आवाहन वसंत मोरे यांनी केलं आहे.
तात्यांचं भावनिक आवाहन, मदतीचे हजारो हात पुढे सरसावले
दरम्यान, वसंत मोरे यांनी मदतीचं आवाहन केल्यानंतर राज्याच्या विविध भागांतून वासवे यांना मदतीचा ओघ सुरु झाला. दिवंगत आमदार वांजळे यांच्या चाहत्यावर्गाने वासवे यांना भरभरुन मदत द्यायला सुरुवात केली आहे. ऑनलाईन आर्थिक सहाय्य केल्याचे स्क्रीनशॉट्सही नेटकऱ्यांनी वसंत मोरे यांच्या फेसबुक पोस्टखाली कमेंट केले आहेत. तात्यांच्या आवाहनानंतर मदतीचे हजारो हात पुढे सरसावले आहेत.
