सुरेखा पुजारी असं या नर्सचं नाव आहे. त्या कुंभारी येथील विडी घरकूल येथे राहत असून मार्कंडे्य रुग्णालयात कार्यरत आहेत. या महिलेच्या घरासमोरी मोकळ्या मैदानात रोज ८ ते १० तरुण खेळत असतात. या मुलांना करोनापासून सावध राहण्यासाठी पुजारी रोज हटकायच्या. आपल्याकडे १२ करोनाचे रुग्ण सापडले आहेत. त्यामुळे आता तरी एकत्र खेळू नका. हा आजार संसर्गाने होतो. त्यामुळे काळजी घ्या, असं त्यांनी काल दुपारी या मुलांना सांगितलं. पण या मुलांनी त्यांना उलट उत्तर दिलं. तुम्ही दररोज मार्कंड्ये रुग्णालयात जाता. मग तुमच्यामुळे करोना येत नाही का? असं सांगत तुम्हाला बघून घेऊ, अशी दमदाटीही केली. त्यामुळे या नर्सने कुंभारी पोलीस ठाण्यात तक्रार दिली. मात्र पोलिसांनी त्याकडे दुर्लक्ष केले. त्यानंतर आज सकाळी त्यांना त्यांच्या घराबाहेरील दोन्ही गाड्या जळालेल्या दिसल्या. त्यांची मेस्ट्रो गाडी आणि त्यांच्या पतीची हिरो होंडा अज्ञात समाजकंटकांनी रात्री जाळली होती. याप्रकरणी त्यांनी कुंभारी पोलीस ठाण्यात धाव घेतली असता त्यांना वळसंग पोलीस ठाण्यात जाऊन गुन्हा दाखल करण्यास सांगण्यात आले. त्यानुसार त्यांनी वळसंग येथे अज्ञात समाजकंटकांविरोधात गुन्हा दाखल केला असून अधिक तपास सुरू आहे.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
