मुंबई: विधान परिषदेच्या निवडणुकीत भारतीय जनता पक्षाचे पाचही उमेदवार विजयी झाल्यानंतर आता महाविकास आघाडीला हादरे बसू लागले आहेत. राज्यसभा निवडणुकीपाठोपाठ विधान परिषदेच्या निवडणुकीत भाजपनं सर्व उमेदवार निवडून आणले आहेत. त्यामुळे महाविकास आघाडीला धक्का बसला आहे. त्याचे परिणाम आता दिसू लागले आहेत. शिवसेना नेते आणि नगरविकास मंत्री एकनाथ शिंदे नॉट रिचेबल झाले आहेत. त्यांच्यासोबत शिवसेनेचे १३ आमदार असल्याची माहिती मिळत आहे. शिंदे आणि समर्थक आमदार सध्या गुजरातच्या सूरतमध्ये आहेत.

एकनाथ शिंदे आणि त्यांचे समर्थक आमदार नॉट रिचेबल झाल्यानं राज्यात खळबळ उडाली आहे. या भूकंपाची चावी दिल्लीतून फिरवण्यात आल्याची माहिती मिळत आहे. या संपूर्ण घटनाक्रमात गुजरात भाजपचे प्रदेशाध्यक्ष असलेल्या चंद्रकांत पाटील यांनी महत्त्वाची भूमिका बजावली. त्यांनीच शिंदे आणि दिल्लीतील भाजपच्या बड्या नेत्याची भेट घडवून आणली.
चंद्रकांत पाटील एकनाथ शिंदेंच्या भेटीला; गुजरातमध्ये राजकीय घडामोडींना वेग
एकनाथ शिंदे यांच्या गुजरातमधील वास्तव्यामागे चंद्रकांत पाटील यांची मोलाची भूमिका आहे. पंतप्रधान नरेंद्र मोदी काल गुजरातच्या गांधीनगरमध्ये होते. त्या कार्यक्रमाला चंद्रकांत पाटील उपस्थित राहणार होते. मात्र हा कार्यक्रम सोडून पाटील अचानक सूरतला गेले. तिथेच शिंदे आणि शिवसेना आमदारांचा मुक्काम आहे. चंद्रकांत पाटील यांनी मेरिडियन हॉटेलमध्ये शिंदे यांची भेट घेतली.

एकनाथ शिंदे यांच्यासह शिवसेनेचे नाराज आमदार सूरतमधील मेरिडियन हॉटेलमध्ये आहेत. हॉटेलबाहेर पोलीस बंदोबस्त वाढवण्यात आला आहे. बॅरिकेडिंग उभारण्यात आलं आहे. एकनाथ शिंदे आणि मुख्यमंत्री ठाकरे यांच्यामध्ये मतभेद असल्याची चर्चा काही दिवसांपासून होती. आता त्यावर शिक्कामोर्तब होताना दिसत आहे.
Eknath Shinde: एकनाथ शिंदेंसह शिवसेनेचे १३ आमदार फुटल्यास काय होणार, ठाकरे सरकार कोसळणार?
हॉटेल मेरिडियनमध्ये चंद्रकांत पाटील आणि एकनाथ शिंदे यांची भेट झाली. यानंतर पाटील हॉटेलमधून निघाले आणि अहमदाबादच्या दिशेनं रवाना झाले. एकनाथ शिंदे यांच्या गुजरात मुक्कामाची माहिती पुढे आल्यानंतर राजकीय क्षेत्रात वेगवान घडामोडी सुरू झाल्या आहेत. सूरतमधून लवकरच शिवसेनेच्या आमदारांना दक्षिण गुजरातमधील अज्ञात स्थळी हलवण्यात नेण्यात येणार असल्याची माहिती समोर येत आहे.

LEAVE A REPLY

Please enter your comment!
Please enter your name here