एकनाथ शिंदेंबद्दल शिवसेना मोठा निर्णय घेणार?; ठाकरेंनी बोलावली ‘पॉवरफुल’ बैठक
उभय नेत्यांमध्ये मातोश्रीवर झालेल्या बैठकीमध्ये उपमुख्यमंत्री अजित पवार, राष्ट्रवादीचे प्रदेशाध्यक्ष जयंत पाटील, खा. प्रफुल पटेल, शिवसेनेचे नेते खा. अनिल देसाई, खा. संजय राऊत आदी उपस्थित होते. या बैठकीनंतर शिवसेना पक्षप्रमुख उद्धव ठाकरे हे शिवसेनेच्या खासदारांसोबत बैठक घेणार आहेत. बंडाचे निशाण फडकावणारे एकनाथ शिंदे यांच्यासोबत बंडात सामील झालेल्या सेनेच्या फुटीर आमदारांवर दबाव निर्माण करण्यासाठी त्यांच्या त्यांच्या मतदारसंघात शिवसैनिकांनी रस्त्यावरची लढाई सुरू करावी, यावर एकमत झाल्याचे समजते.
शिवसेनेतील बंडखोर आमदारांच्या विरोधात कायद्याचा बडगा उगारताना या प्रक्रियेसाठी जास्तीत जास्त कालावधी लागणार आहे. हा कालावधी लांबत गेल्यास बंडखोर आमदार यांच्यावर दबाव निर्माण होईल. शिवसेनेच्या बंडखोर १६ आमदारांवर कारवाईची प्रक्रिया सुरू करण्यात आली आहे. त्यासाठी विधानसभा उपाध्यक्ष नरहरी झिरवाळ यांनी कायद्याच्या बाजू तपासण्यास सुरुवात केली आहे. यासंदर्भात पुढील कारवाईसाठी अॅडव्होकेट जनरल यांचेही कायदेशीर मत मागविण्यात आल्याचे समजते.
