mantralay news: राजकीय अस्थिरतेमुळे चित्र पालटलं; मंत्रालयात शांतता, कुजबूज अन् उत्सुकता – shiv sena leader and urban development minister eknath shinde’s revolt also affected the mantralay

मुंबई : शिवसेना नेते आणि नगरविकासमंत्री एकनाथ शिंदे यांच्या बंडानंतर राज्यातील राजकीय घडामोडींना वेग आला आहे. परंतु, ज्या मंत्रालयात राज्याचा प्रशासकीय गाडा हाकला जातो, तिथे मात्र कमालाची शांतता पसरली आहे. नेहमीच्या तुलनेत मंत्रालयात येणाऱ्या अभ्यागतांची वर्दळही कमी झाल्याचे दिसून येते. त्यामुळे मंत्रालयात सन्नाटा असला, तरी सर्व सनदी अधिकाऱ्यांचे लक्ष मात्र या बंडखोरीचा निकाल काय लागतो, याकडे लागले आहे. रोजच्या राजकीय घडामोडींची माहिती करून घेण्यासाठी सनदी अधिकाऱ्यांमध्येही धावपळ सुरू असल्याचे चित्र मंत्रालयात दिसून येत आहे.

मंत्री एकनाथ शिंदे यांनी बंड पुकारल्यानंतर उद्भवलेल्या परिस्थितीच्या पार्श्वभूमीवर सध्या नवीन पर्यायाचा विचार सुरू आहे. ४०हून अधिक आमदार शिंदे यांच्यासोबत गुवाहटीला गेले आहेत. राज्यातील या राजकीय घडामोडींकडे राज्याचे लक्ष लागून राहिले आहे. त्यामुळे गेल्या काही दिवसांपासून मुंबईतील सर्वच राजकीय पक्षांची कार्यालये, वर्षा निवासस्थान आणि नेते मंडळींच्या बंगल्यांवर कार्यकर्त्यांची गर्दी ओसंडून वाहत आहे. पक्षाची भूमिका जाणून घेण्यासाठी सकाळपासून कार्यकर्ते आणि पदाधिकाऱ्यांची धावपळ सुरू असते. तर दुसरीकडे राज्याचा प्रशासकीय गाडा ज्या मंत्रालयातून हाकला जातो, ते मंत्रालय मात्र ओस पडल्याचे चित्र गेल्या दोन दिवसांपासून दिसून येत आहे. अधिकारी आणि कर्मचारी वर्ग वगळता मंत्रालयात कोणीही फारसे फिरकताना दिसत नाही. काही ठराविक विभाग सोडता, इतर विभागांमध्ये येणाऱ्या अभ्यागतांची वर्दळ कमी झाल्याचे चित्र दिसून आले आहे. नेहमी कार्यकर्ते आणि पदाधिकाऱ्यांच्या उपस्थितीने ओसंडून वाहणारी मंत्र्यांची दालने ओस पडली आहेत.

पवार-ठाकरेंमध्ये ‘मातोश्री’वर रणनीती ठरली; बंड मोडून काढण्यासाठी ‘अ‍ॅक्शन प्लॅन’ तयार

मंत्रालयात चर्चा मात्र सध्याच्या राजकीय घडामोडींवरच रंगताना दिसते आहे. अनेक सनदी अधिकाऱ्यांचे लक्षही राजकीय घडामोडींकडे लागले असून, या बंडाळीचा निकाल काय लागतो, याबाबत अधिकाऱ्यांमध्ये उलट सुलट चर्चेला उधाण आले आहे. निकालाच्या उत्सुकतेपोटी अनेक अधिकाऱ्यांची पावले मंत्रालयातील पत्रकार कक्षाकडेही वळत असल्याचे चित्र पाहायला मिळत आहे.