‘माणूस एक तर विवाहित असू शकतो किंवा आनंदी असू शकतो, दोन्ही कधीही होऊ शकत नाही,’ असं विनोदी अर्थानं म्हणत दिग्दर्शक राज मेहतानं त्याच्या ‘जुग जुग जियो’ या सिनेमाचा डोलारा उभा केला आहे. लग्नव्यवस्थेशी संबंधित हा संवाद सिनेमात गमतीदार पद्धतीनं दाखवण्यात आला आहे; पण हा प्रश्न आज अनेक जोडप्यांना कदाचित पडला असेल हे नाकारून चालणार नाही. मग ते जोडपं पस्तिशीतलं असो किंवा साठीतलं. ‘आदर्श जोडपं’ कोणतं, ते कसं असतं, कसं वागतं, त्यांच्यात खरं प्रेम असतं, की केवळ आकर्षण अशा प्रश्नांचा शोध घेण्याचा प्रयत्न हा चित्रपट करतो. या चित्रपटात दिग्दर्शकानं एका कुटुंबाची गोष्ट मांडली होती. हा सिनेमा पाहिल्यावर आपण आपल्या जोडीदाराविषयी मग बायको/नवरा असो, प्रेयसी/प्रियकर असो किंवा मैत्रीण/मित्र, तिच्या/त्याच्याविषयी विचार करू लागतो.

बालमित्र असलेल्या कुक्कु (वरुण धवन) आणि नैना (किआरा अडवाणी) यांचं एकमेकांवर प्रेम असतं. पुढे त्यांचं लग्न होतं आणि नैनाला कामानिमित्त कॅनडाला स्थायिक व्हावं लागतं. कुक्कुदेखील तिच्याबरोबर कॅनडाला जातो; पण या प्रेमीयुगुलात लग्नाच्या पाच वर्षांतच घटस्फोट घेण्याची वेळ येते. दुसरीकडे कुक्कुचे आई-वडील (अनिल कपूर, नीतू कपूर) यांच्यात वरवर सर्व ठिकठाक सुरू असतं, परंतु वडील अजूनही नव्या प्रेमाच्या शोधात असतात. त्यात मुलीचं अर्थात कुक्कुच्या बहिणीचं (प्राजक्ता कोळी) लग्न होणार आहे; पण तीदेखील नाईलाजात्सव हे लग्न करत असते. हा ‘जुग जुग जियो’चा मामला काहीसा ‘कभी खुशी कभी गम’ या शीर्षकाला साजेसा आहे. सिनेमात प्रामुख्यानं वेगवेगळ्या वयोगटातल्या तीन लग्नांची कहाणी लेखक-दिग्दर्शकानं मांडली आहे. कथानकात तीन लग्नांच्या माध्यमातून वेगवेगळे दृष्टिकोन समोर येतात.

संवाद वगळता लेखन पातळीवर सिनेमा अनेक ठिकाणी वाटतो. सुरूवातीला मूळ विषयावर सिनेमा येतो; पण पटकथा डगमगू लागते. प्रसंगांचे भडीमार होऊ लागतात. हा मामला मनोरंजक असला, तरी मूळ विषयाशी फारकत घेणारा. उत्तरार्धात सिनेमा मूळ वेग पकडतो आणि कथानकाचं वर्तुळ पूर्ण होतं. नात्यांतला गोंधळ आणि घटस्फोट या विषयांवर गेली अनेक वर्षं सिनेमे होत आहेत; पण दिग्दर्शक राज मेहतानं यावेळी हा संवेदनशील विषय विनोदी पद्धतीनं आणि थोडा नाट्यमय करून मांडला आहे. बायको जास्त कमावणारी असेल, तर नवऱ्याचा अहंकार दुखावला जाणं, लग्नानंतर आई होण्याचं दडपण, स्थिरस्थावर होण्यासाठी घेतलेला लग्नाचा निर्णय, लग्नाला तीस-पस्तीस वर्षं होऊनही प्रेमाच्या शोधात असलेलं जोडपं, अशा विविधांगी पटलावर सिनेमा आपल्याला घेऊन जातो. सर्वच कलाकारांचं काम उत्तम आहे. खासकरून कियारा अडवाणीला तिचं अभिनयकौशल्य दाखवण्याची संधी मिळाली आहे. वरुण धवनच्या सहज अभिनयामुळे तो व्यक्तिरेखेत मिसळून जातो. अनिल कपूर यांच्या अभिनयातील बारकावे अनुभवण्यासारखे आहेत, तर नीतू कपूर यांनादेखील बऱ्याच वर्षांनी पडद्यावर पाहणं रंजक आहे. चाहत्यांनी ‘जुग जुग जियो’ हा आशीर्वाद एकदा घ्यायला हरकत नाही.

….

चौकट

जुग जुग जियो

निर्माते ः धर्मा प्रॉडक्शन्स, वायकॉम १८ स्टुडिओज्

दिग्दर्शक ः राज मेहता

लेखन ः अनुराग सिंह, ऋषभ शर्मा, सुमित भटेजा और नीरज उधवानी

कलाकार ः अनिल कपूर, नीतू कपूर, वरुण धवन, कियारा आडवाणी, प्राजक्ता कोळी

छायांकन ः जय पटेल

संकलन ः मनीष मोरे

दर्जा ः २.५ स्टार

LEAVE A REPLY

Please enter your comment!
Please enter your name here